Sheena Bora ji onoki alenseta südaktsü: Shyamvar Rai

Mumbai, May 11 (Agencies): Sheena Bora tepsetba ken o nung tongti aibelensang, Indrani Mukerjea’er gari anisang, Shyamvar Rai-i Bodhbarnü special CBI court ka dang, pa tai nangzüker ka kümner aser ochi kar jungkai adoktsüner, ta ashi.

Taoba hopta Rai-i shidi ka ajanga court dang, pai ochi jungkai adoktsüner aser iba ken o nung tatok agütsüdaktsüner, ta mepishia liasü.

Tanü Special Judge, HS Mahajan-i Rai sabangi ajaba sülen Rai-i, “Iba aibelen dak sentakba nung tatalokbatem ni meteta lir aser nisung tepsetba (Sheena) nungji (ni) shilem agia lir,” ta ashi.

Paisa, Sheena ji alenseta südaktsü, ta ashi.

Rai-i iba ken o nung pa tai nangzüker ka asütsü mepishiba atema telangzübaji May 17 nü agüjanga ta court-i CBI dang tuyu.

Sheena tepsetba ken o nung 2015 küm August ita nung Rai mezüng pua liasü.

2012 küm April ita nung Indrani den taoba mapang la kinüngbu, Sanjeev Khanna aser Rai nungeri Indrani’er jala, Sheena (24) gari telung nung alenseta südaktsü ta tai tonglokja lir, Sheena tepsetba tatalokbaji August ita nung temai adoka liasü, aser iba ya ken o ya senotsü dak sentaktepa lir ta melung malemer.