Sheena Bora tepsetba ken o nung Peter Mukerjea puogo

New Delhi, November 20 (Agencies): Taoba mapang shishilembar tetsüdi, Peter Mukerjea Brihostibar aonung 2012 küm par rabir jala, Sheena Bora tepsetba ken o nung puogo aser Hokolbar nü CBI ket nung agütsüogo.

Aibelenba kuli samatsüba atema IPC Section 201 kübok pa anema ken o benok. Nisung tepsetba ken o ya August ita nung temai adokba mapang nungi police-i Peter Mukerjea dang sashia asüngdangyaogo.

Peter ya Sheena tepsetba ken o nung tongti aibelener, Indrani Mukerjea kinüngbu lir, aser tanü pa anema nisung tepsetba ken o benokba sülen local court kati Hombar nü tashi pa CBI ket nung agütsüogo.

Yashi Peter apusang CBI-i Metropolitan Magistrate court dang, pa kinüngtsü den külemi sentong tamajung yangluba nung pa densema lir aser Sheena tepsetba nunga shilem agia lir, ta ashi.

Sheena Bora ya Indrani mezüng kinüngbu, Siddharda Das den sosemba jala liasü.

CBI atema jembisang Additional Solicitor General, Anil Singh-i court dang, Sheena tepsetba jakdang, tepsetba mapang aser iba sülena Peter aser Indrani na tsüngda maneni jembia liasü, ta ashi.

Metropolitan Magistrate-isa iba ken o ya Delhi nung aliba sessions court ka nem agütsü aser aibelen tonglokja alir asem-Indrani Mukerjea, taoba mapang la kinüngbu Sanjeev Khanna (Sheena rabir tebusa) aser gari anisang Shyamvar Rai nunger Dec. 3, 2015 nü iba court matsüngdangi anir oang ta tuyuogo.

Iba ken o nung taküm August ita nung pua alirtemji judicial ket nung lir. Tamalen Mumbai police-i asüngdangyaba mapang Peter-i Sheena dak kechi atalok’ar pai memetet, kechiyong Indrani-i la bendanglen lir ta ashi, ta aiben langzüa liasü.

Indrani, Khanna aser Rai nungeri 2012 küm April ita nung arishi küm 24 Sheena tepsetba sülen Raigad district nung aliba arem ka nung intokba aser taküm August ita nungang tasümangji angu.