Sheikh Hasina December ita linüki meyipa aotsü sentong lir

New Delhi, Chiteni/July 10 (Agencies): Bangladesh ato kilonser menden nungi atsüngdoker alila Sheikh Hasina, shiba nem lar linüki tasüba temerenshi agütsütsü obendang agüja lir, la December ita lar party nung külem tenzükertem den külemi lar linüki meyipa oa bendanga agütsütsü tebilemba lir ta Hokulbarnü osangbener dang ashi.

Hasina-i ashiba agi, la aser lar Awami League party züngsemtem, shirnok linük nung nokdanga lir, parnok pei mulungtetba nung linüki meyipa oa okadaki pei sasa aotsü sentong lir.

2024 küm kaketshir temi anir linük tesem ajunga nung hopta aika longkak aitba sülen Hasina ya yimsüsüba menden yutsütsüsa akum, koba Bangladesh puti otsü nung yimtenren tsütsü mepetmesü tulutiba akum. Lai ato kilonser ama kümsük balala nung lar linük küm 20 tenzüka aru.

November ita linük indang war-crimes court ajanga kaketshir temi anir longkak aitba tashiyim amshia azüoktsü atema totuyuba agütsü ta tai tonglokja tasüba agi merenshitsü obendang agüja liasü. Hasina-i bendang lima nung jenoker item taitsüba magizüker.

December ita Bangladesh-i meyipa aotsü sentong sangdongba mapang, “Ni meyipa aoba mapang parnoki aputsü akok, parnoki ni tepsettsü akok,” ta arishi küm 78 tain Hasina-i osangbener dang ashi.

“Ajisüaka ni aotsüla. Kü party lenirtem aser inyakertem kanga timtem nung lir. Tasüba arura, ni ozü li nung arudaktsüner, kong kü tsürabor rema lir, aser kong parnok azü lalu,” ta lai ashi.

Osang balala ajanga ashiba agi, Awami League workers aika lar sorkar lapoba sülen apu, ken o benok aser teka sangshi.

Hasina-i la meyipa aotsü sentong ya Bangladesh sorkar dang ano memetetdaktsü ta ashi. “Democracy, vote agütsütsü temeden, Awami League indang political rights aser ochi obendang ya miimshia jembitsüba onük masü,” ta lai ashi.

Taoba ato kilonseri la aputsü metsübor, kechiaser la taoba mapang tepuokdak aiben yuogo ta ashi.

Longkak aitertem lar ki tsütsüi aruba ajanga la takum timtem nung lir ta angateta lai linük yutsütsüsa akum, ta Hasina-i ashi.

“Kodang sorkari kati mapang talangka inyakdir, aibelen ataloker – kecha sorkari aibelen masüba mali. Saka tajung aser tamajung bendangtsü, sorkar ka shidak aser tai bendangtsü nübur meyong. Ni obendangba nübur nem yutsür,” ta ashi.

Awami League asendenshitsü atema lai Bangladesh nung parliamentary constituencies 300 aliba nungi 125 awajema online meeting tem menogo ta lai ashi.

“Parnoki ni aitsür alitsü, aser ni election nung metokteptettsü. Saka kechiba parnoki Awami League shibangtsü? Onoki majung inyaka lira, nüburtem nem lemtetdakjang,” ta Hasina-i ashi.

2024 küm kaketshir temi anir sorkar anema longkak aitba ajanga lai ato kilonser ama kümsük balala nung küm 20 yimsü süa aruba tembanga Bangladesh nungi Hasina ajen. November ita Bangladesh indang International Crimes Tribunal ajanga longkak aiter tepseta azüokba atema la meliaka tsüba temerenshi agütsütsü obendang agüja liasü. Hasina-i item taitsüba magizük aser la atsüngdokba sülen India nung jenoka alir.

La linüki meyipa aotsü sentong aliba ya ajanga Bangladesh yimtenren tsütsü mepetmesü tali ang akumtsü amai ajiteter, kong küm ana jungnüa yimten yimsüsüba tsütsü mepetmesü adoka aruba sülen tang aliba interim sorkari tensa azüoktsü meranger.

Iba yagi Dhaka aser New Delhi tesendaktep nung kongshitsü akok, koba India-i taoba ato kilonser jenoka alitsü melaba sülen mejungi lir.

Bangladesh-i aiben India dang Hasina yoktsü asüngdanga liasü.

La linük yutsür jena aoba sülen osangbener den mezüng sensaksemba mapang, la meyipa aotsü atema bendanger sorkar kata dena sensaksem masü ta Hasina-i ashi.

La meyipa aotsü telemtetba agiba ibai mezüng masü.

“Dhaka nung aliba ketdangsür temi ni meyipa anir oner, parnoki ni meyipa yoktsü atema India dangi shiti aiben züluogo. Ni küsasa aotsü,” ta Hasina-i ashi.

April ita India indang Ministry of External Affairs ajanga Bangladesh indang ‘extradition request’ asadanger aser sorkar tasenba den tajunglen nungi ajurutepa linük ana tsüngta tesendaktep nung tashi inshiner, ta shia liasü.

1975 küm mitkari tashiyim amshia sorkar atsüngdokba mapang Hasina tebu Sheikh Mujibur Rahman, linük kumtetba nung lenir, aser lar kinunger timba tepsetba sülen Bangladesh yimtenren nung la ya nübu tejangja ka ama lia aru.

1981 küm bendang lima nung jenoka aliba nungi meyipa shilangba sülen mitkar anema nokdakba movement nung la tejangja nübu ka akum aser democracy bhukuma nokdakba mapang aiben apu.

2007 küm la ya ochimashi ken o nung mitkari yariba caretaker government kati tepuokdak ayu aser chiokba sülen 2008 election nung takok tulu ngua yimsüsüba mendeni atu.

Bangladesh rongsenketzüng melenshitsüba asoshi Hasina tenüng asanger, saka lar sorkari parnok anemer ajemrepa ayu aser democratic institutions tashi mait kumdaktsü ta aitsür, koba lai magizüker.

UN report ka nung, 2024 küm kaketshir temi anir longkak aitba azüokdang nisung 1,400 shi asü, ta ashir.