Sheikh Hasina nem UN Environment Prize agütsütsü

Dhaka, September 15 (Agencies): Policy Leadership shilem indang United Nations (UN) environment award temaba, Champions of the Earth 2015 sempet agütsütsü asoshi Bangladesh Ato Kilonser, Sheikh Hasina shimtetogo ta bdnews24 osangi tanü Mongolbar nü metetdaktsüogo.

“Bangladesh lenila, Hasina-i alima tsüngsang mupong balaka akümbaren azüoka kasaji tajungba kümdaktsütsü asoshi nungdakba maparen bendanga agüja inyakba nüngtem nem la nem Champions of the Earth 2015 sempet tan September ita 27 nü New York yimti nung agütsütsü renemogo,” ta UN Environment Programme (UNEP)-i osang jangjashitsü.

“Alima ajunga nung terenlok tajemba aliba linük ka indang Ato Kilonser menden abener ka dang süaka, Hasina-i alima tsüngsang mupong balaka küma melenshibaren azüokba ajanga lokti aser rongsenren jenjang naprongla na nung terenlok alir ta kuli tejangja nguteta lir,” ta par teloki ashi.

Nütsüng yongsük nisung million 160 shi aliba Bangladesh linük ya alima ajunga nung nütsüng yongsük timba aliba linük rong nung densema lir aser par linük ya alima tsüngsang mupong balaka küma melenshiba ajanga bener arutsüba timtem khuret tesashitiba ajurur linük rong nung densemer ta mongintemi metetdakja lir.

Cyclone yipru mupong, tzümetsüng aser tzü khenyoni mongui kanga dang takong akümba tatalokbatemji Bangladesh linük indang otsü nung shilem ka ama züngshia arur saka par linüki tarutsü mapang nung iba amala lendongtsüdong tesashiba ajurutsü ta mongintemisa metetdaktsüogo.

“Hasina-i aniba Bangladesh sorkari alima tsüngsang mupong balaka küma melenshibaren den sentakba timtem khuret takok ngua ajurutsü aser kasaji azüoktsü asoshi terenemshiba tulu agiba ngua par lenir nem Champions of the Earth 2015 sempet agütsütsü renemogo,” ta UNEP-i nenshia ashi.

2009-2012 tsüngda nung dollar sen million 300 shi bendenba linük, Bangladesh ya alima ajunga nung pei meyong indang Climate Change Trust Fund tentetba linük mezüngbuba lir.

Champions of the Earth sempet ya United Nations (UN)-i alima lipoküm kümzüka ayütsü asoshi bendanga agüja inyakba nisung mesüra tentet balala nem kümshi agütsüba tematiba sempet lir.