Sheriff-i Egypt Ato Kilonser tasenba inyaktsü tenangzükba agir

Egypt Tir, Abdel Fattah el-Sisi (Achijilen)-i Egypt Ato Kilonser tasenba inyaktsü asoshi taoba Petroleum Minister, Sheriff Ismail nem Cairo yimti nung tanü Honibar nü tenangzükba agidaktsüba noksa nung angur. (Cairo, September 19)

Cairo, September 19 (Agencies): Egypt Tir, Abdel Fattah el-Sisi-i Ato Kilonser tasenba, Sheriff Ismail aser pai aniba sorkar tasenba nung yimsüsürtem nem yimtsütsü tenangzükba tanü Honibar nü Cairo yimti nung agütsüogo.
Taoba Egypt Petroleum Minister, Sheriff-i aniba sorkar tasenba nung taoba Egypt finance minister, interior minister aser defense minister-temi maneni parnoki abenba yimsüsütsü menden abentsü shimshiba osang jangjaogo.
Ochimashi inyakba ken o benoktsü tenzükba sülen taoba Ato Kilonser, Ibrahim Mahlab aser pai aniba Cabinet-i Egypt sorkar taoba hopta loksaba sülen Sisi-i sorkar tasenba nung yimsüsürtem nem tanü tenangzükbaji agütsür lir.
Tanü yimsüsütsü tenangzükba agiba sorkar tasenbai taruba October ita 17 nungi tenzüka taküm December ita 2 nü tashi shilem balala lemsar agitsü ayongba parliamentary elections awashitsü renemogo.
Egypt-i par parliamentary election sentongji taküm 2015 küm tetenzüklen agitsü ayonga liasü saka Egypt sorkari taoba Egypt Tir, Mohamad Mursi-i aniba Islamist yimtenren telok, Muslim Brotherhood züngsemtem anema kanga sashia apusor ta shia, nübur temeten asoshi nokdakba teloktemi aitsüba ola adokba yong election agitsü mapangji atsülangshitsüsa aküm.
Ano külen, süpokrem sen dollar sen million 1 dak tema meshia agiba ken o nung ajemdaker taoba Egypt Agriculture Minister, Salah el-Din Helal anema bushisüngdang sentong tenzüka lir.