Shi aser Shisatsü nung anibelem anepaluyim

Tanü asüng shi aser shisatsü nung anibelem (stress) ya kanga bulur. Iba ya nisung ajaki khenbosa ajangshir. Asenok mapa tali mesüra khuret tali den chiyungtsü tai achiba, tzü-mopung memerükba aser temang nung tashi maitba ajanga shi aser shisatsü nung anibelem adoker. Iba timtem ya nisung ajaki pei sasep nung anepalur.
Teküpoklen iba timtem anepaluyim kar agütsür:-
Jajazüba : Jajazüba ya exercise ajak dang temelatiba aser tajungtiba lir. Jajazüba ajanga anema lidaktsüba dang masü saka tekolok anisüngzükdaktsür aser ibaji ajanga shi aser shisatsü nung anibelemba süngjemdaktsür.
Mapang tatsüka langka ka arokaroka bilemtsüla : Langka ka arokaroka bilemba ajanga shi aser shisatsü nung anibelem kanga junga süngjemdaktsür. Minute 30 bendanga agüja ‘meditate’ asüba ajanga shisatsü nung sünepdaktsür.
Ayipjanga mejangtsüla : Ayipjanga memejangba ajanga shi ser shisatsü nung kanga ani mesüngzükdaktsür. Anogo ka nung gondha tener (7) mesüra ti (8) amoa oa mejangba ajanga shi aser shisatsü nung anisüngzük angur.
Tebilemba tajung aser akoktsü ta asüba tangatetba alitsüla : Tajung aser akoktsü ta bilemba ajanga shisabulu ajema kümdaktsür aser ibaji ajanga tekolok anisüngzükdaktsür, koba ajanga asenok pela aser süngjema liteter.
Temang nung teyari agütsüba chiyungtsü achitsüla : Chiyungtsü tajung achiba ajanga temang anema lidaktsür. Blueberries, salmon aser almonds achiba ajanga shi aser shisatsü anibelem süngzükdaktsür. Ano green tea mesüra masala tea tera ajemba ajanga shimang aser shisatsü süngjemdaktsür.
Nüburtem nem shi aser shisatsü nung anibelem angatetdaktsütsü aser iba timtem anepaluyim meteta kümdaktsütsü asoshi küm shia alima rangben nung November 4 nü ‘Stress Awareness Day’ ta ser amunger.

Source : Internet