Shi aser tekolok külemi renlokra Nagaland renloktsü

Dimapur, Monupii (May) 12 (TYO): Naga nungertemi terenlok indang kanga jembir saka nübortemi shi renloktsü indang dang bilemer. Ajisüaka, tongtipangbaji asenok tekolok renloktsüba lir aser asenok shi aser tekolok külemi renlokra, Nagaland renloktsü, ta Wb. Tali Longkümer IAS (Rtd.)-i ashi.
May 12, 2018 nü Kohima Ao Telongjem (KAT) taküm atema mezüng lokti senden amendang Tali Longkümer-i iba olen jembi.
Sendenji Molu Ki, Kohima nung amen aser tongti o jembir Wb. Tali-i “Tetangshi Senso” onük jembia liasü.
Paisa Aortem dang meranga inyaktsü aser kechisarena ajak nung ochishia alitsü atema ayongzük.
“Asenoki kodaser tetangshi senso ka akümtsü ta süra, asenoki arrtsü adena aotsüla. Sobaliba metetba kija agi nübortem tejakleni moutettsü saka asenoki asen arrtsü adena aotsüla aser tangar den shisatsü lemsateptsüla. Yamaji inyak nung dang asenok tetangshi senso ka akümtsü” ta Wb. Tali-isa ashi.
Senso tajung ka ama asenoki tashi angatsüla, ochishitsüla aser mangdang ayutsüla. Tsüngremi medeni takok mangutsü anungji Aortemi Tsüngrem tsübutsüla aser Pa dang nungi maneni shisatsü meshia Aor dang masü saka Naga nunger len anitsüla, ta paisa ayongzük.
Senden nung Higher & Technical Education Minister, Temjen Imna Along-i tajungshi o jembidang, Aortemi telongjem indang jembitsü jangrar saka longjemtsü atemabo teinyaktsü mapa meinyaker, ta ashi.
Aortem tebang agi dang longjema lir saka asangsang nung asenok ka küma melongjem tashi aser külemi tebong kümer menokdak tashi, asenoki takok mangutsü. Aortemi ajemalutsüla, Tsüngrem dang nungi shisatsü meshitsüla aser tim mapa inyaktsü atema asen taküm meyipa reprangshimtsüla, ta Minister Imna Along-isa ashi.
Aortemi tatok agütsütsüla aser kati ka asoshi aria bilemteptsüla. Asenoki iba tangatetba nung lira Tsüngrem asenok den adentsü aser pai asenok takokleni len anitsü, ta paisa ayongzük.
Senden nung Wb. Lipokmeren IAS (Rtd.)-ia o jembidang Aortem tamasa melenshitsü aser iba sülen Nagaland melenshitsü atema len anitsüla ta ayongzük.
Paisa Aor MLA tem party mesüra tanga mangatettep ajak toktsür longjemtsü aser Naga lima nung temelenshi bener arutsü atema aser Aor mezüngpurtemi konang mapa inyakbatem ama mapa inyaktsü atema tayongzükba agütsü.
Senden nung KAT Tir Er. Talitoba Sanglir aser Kohima Watsü Telen Tir natia o tatsütsü jembi.
Senden nung KABA Pastor, Yapang Walling-i temoatsü meshia sarasadem, Ao Students Union Kohima-i ken ka aten, KAT nung luden balalai osang agütsü aser KAT Tatong Tir Chiden Yaden-i anküp tepela o jembi.
Senden nungsa kümsük 2018-20 atema KAT ketdangpurtem shim.
* Tir- Mr. Chiden Yaden,
* Tatong Tir Mr. I. Chubalepzuk,
* Tongti Tezülur- Mr. Moameren Imchen,
* Repsem Zülur- Mr. Lanusanen,
* Senotsü Zülur- Mr. Pangertoshi Pongen,
* Kimen – Dr. Aochuba.