Shia Waqf Board-i Muslim nunger nem agütsüba ali agitsü bangjem

Lucknow (Uttar Pradesh), November 28 (Agencies): Uttar Pradesh nung Shia Central Waqf Board Chairman, Waseem Rizvi-i, Muslim nunger nem agütsüba ali acre 5 ji Sunni Waqf Board-i magizükra Shia Central Waqf Board-i agitsü atema bangzüng ka renemogo, ta metetdaktsü.
Shia Central Waqf Board-i aliji agira onoki yangji hospital ka yanglutsü, aser iba hospital nungji tamangba yimsü balala nungi nübur ajak nem angati treatment agütsütsü, ta Rizv-i metetdaktsü.
Ayodhya nung mangatettep li ken o nung Supreme Court-i agütsüba obendang reprangshitsü atema temepishiba ka agütsütsü asü magutsütsüar telemtetba agitsü atema November 26, 2019 nü Lucknow yimti nung Sunni Waqf Board senden mena liasü. Senden tembangba sülen Sunni Waqf Board züngsem. Abdul Razzaq Khan-i, parnoki Supreme Court obendang anema temepishiba ken o magütsütsü atema telemtetba agiogo, ta metetdaktsü.
Khan-i, “Senden nung züngsem timbakati Ayodhya ken o reprangshitsü atema ken o benoktsü memelung,” ta metetdaktsü.
November 17, 2019 nü All India Muslim Personal Law Board (AIMPLB) aser Maulana Arshad Madani-i aniba Jamiat Ulama-i-Hind natibo Ayodhya ken o nung nung SC obendang anema parnoki temepishiba ken o benoktsü, ta metetdaktsü.
November 9 nü Supreme Court-i Ayodhya nung Ram tekülem ki yanglutsü atema obendang agütsü aser mosque ka yangutsü atema Sunni Waqf Board nem ali acre 5 agüjang ta Centre dang tuyua liasü.