Shiba dang Evangelist & Shiba dang Missionary ta ajar ?

– Rev. S. Temjen Longkumer, Chumukidema.

Khristan tamangba yimsü tsütsü inyakyim mesüra nüngjakuja Ao lima nung koma amshir aser koma jayajakur kasaji asenok dang nungi angazüka Naga nunger tangar kin aikati amshir. Aji asenoki mamatsüla.
Tanü asen Aortemi Evangelist ta ajaba tenüng aser Missionary ta ajaba tenüng ana tetsüngda bendanga mangateti amshiba angur. Iba nüngja ana amshiba nung tangatettsü kar nüngdaka lir ama ajitetba agi tatsü agi yamai lemsateper.
1. Evangelist / Sayutsüngir :- Iba tenüng ya Greek o Evangleion nungi aru; tetezü Osangtajung. Anungji shibai Yisu Khrista tekümtet Osangtajung sayua jajar pa/la dang Evangelist / Sayutsüngir ta ajar. Laishiba nunga yamai zülua lir, “Osangtajung indang Arogotem nung aser amangba pur lokti balala nung Tsüngrem Osangtajung sayua jajar ajak dang Evangelist ta ajatsübaji tapet nüngja lir.
2. Missionary :- Alima tazü, ano tanü tashi nung Yisu Khrista Osangtajung ken tanga mangashidangba lima aser nisungtem dangi tsüngdong orr/oagi, shibai Osangtajung mezüngbuba sayua angashidaktsür aser parnokji temulung meyipa tzü nung baptitsür, aser Yisu nütsüng kümdakja arogo tasen tenteta yutsür. Iba ama inyaker Tsüngrem tenzüker dang Missionary ta ajar.
Laishiba nunga Yisui kasaji sayua aliba angur. “Aser Yisui arua parnok dang ashi, Kotak nung aser alima nung ain-tashi ajak kü nem agütsüogo. Anungji nenoki oang aser kin ajak nütsüng kümdakjang. Tebu, Techir aser Tanela Temeshi tenüng nung parnok baptijang”. Mathi 18:18-19. Idaki Yisui ashiba nungji Missionary tetezü aser Missionary mapa tejangja teyua lir. Idaki Yisui ashiba tongtibangtiba Oji nütsüng kümdaktsübaji lir. Yisu memetetba lima purtemji Pa dak amangertem kümdakjang ta ashir.
Tanü asen Aor Khristantemi iba nüngja ana tetezü bendanga mangatetba agi, Yisu nütsüng kümadoker aliba tamangertem rongnung aser Arogo tenteta akadak semdangba Tsüngrem O jembia jajar ajak dang Missionary ta ajar.
Anungji tatsü agi asenoki yamai angateta yudi. Arogo tenteta akadak, tamanger rongnuuung zülang, zülanga Tsüngrem O dang jembia, tanela anir aruba wadang nung jajar ajak dang Evangelist / Sayutsüngir ta ajatsüla. Saka shiba dang Missionary ta jadir pa/la kolak manung item khuret benloka alitsüla. (1) Sayutsüngiba (2) nütsüng kümdakja baptitsüba (3) Khristan kaket-ken-o adokdaktsüba (4) Health care / Social gospel (5) Arogo tasen tenteta acha-ayangba aser (6) Mission field / Station anepaluba.
Mezüng ashi ama, Sayutsüngir / Evangelist mapabo tera tongmelang, Osangtajung sayua, Counselling agüja, tanela anir aruba, saka chichiba nung Missionary ka mapabo item denji ano tanga maparen tasak aika repsema lir, anungji asenoki iba tanagatetba nungji tapet mapa nung tapet nüngja amshitsü nüngdaker.