Shibai aremzüktsü ?

Asenok Aortem ya tangar putepdaktsüba kin lir, kechiyong asenok ya osangtajung abenertem. Ibayongji, tangaribo Aotsür Aortem ya taremzük aser temeim agi sünga aliba purtema ta bilemer. Atangji, bendanglen tesem aika nung asenoki temeim mapa aika nung inyaker aser asenoki tangar dangbo aremzüktetter. Ajisüaka, asenok asoshi tia majung kaji asenoki asenok alidak temeim mapa meinyaktetter aser asenoki asen adianutem dang maremzüktetter. Aji oda, mapa tajung aika inyaker molumii aotsüba purtemji asenok südi ta bilemer. Atangji, shin o nung ashi ama, temeim mapaji kidang nungi tenzüktsüla. Ibaji dang shitakba temeim asütsü. Tanü asenok Aortem rongnung meputeptetba tia ya reprangdangra, linük tenzükertem dangbo tema nung alir nübortemang meputepba aser ano külen nübortem dangbo linük tenzükertemang meputepba ta meputepba agi asenok longjemer mapa tajung inyaktsü mapang mangur. Linük tenzükba mapa nunga reprangdangra tangar Delhi nung India sorkar den Naga yimten ken o tasak benoka jembidang, asenok yangi auyi ponga asenok o asenok na aitsütepa raratepa amongbaji tangar tsüngdang temenünütsüka lir. Iba amai asenok o asenok na meputeptet aser maremzükteptet alidang tangar Delhi nungi yimten telatetba ka bener arura  koda asütsü (?) ta shisabolua bilemer. Iba kasaji ano nübortem rongnung kin kidong otsü aser Jungli aser Mongsen otsü jembiba agi asenok meputeptettsüsa akümba asenoki angur. Alima nung nisungtem apokba otsü yabo tebushi asüyonga bushitsü, anungji kin kidong otsüjia bushitsü. Ajisüaka, kin kidong aser nisung apokba otsü bushiba aser jembiba agibo asenok o asenok na tsüngda meputep madoktsüla. Asenoki Aor Chungliyimti nungi apok ta jembir aser aji shitaka ta agizüktetter. Ajisüaka, Laishiba nungbo asenok tetsü tebou ya Tsügremi yanglu aser item nung jagi jakzükyonga aruba purtema ta jembir. Ajisüaka, tangatetba ana, Chungliyimti o Laishiba naji meraratepdaktsür, kechiyong asenoki asenoksasa angateta benteta agir. Tanü asenok putepa alitsü atema iba ama tangatetbaji nüngdaker. Atangji, alima nung nisungtem meputeptsübaji tim dang lir saka meputepnüba agi teti meputepi alitsübaji masü. Aji oda, meputepi aliba timtem akoktsüba mozü tajungtibajibo taremzük lir. Taremzükji temeim aser tangatetba nungi adoker. Maremzükteti aliba nung ajak akoksar saka aremzük nungbo ajak ajangzüker. Aji meteta, asenoki tangar dang dang masü saka asenok o asenok na rongnunga aremzüktepba lira, iba jagi tangari asenok tali akümtsübutsü. Asenokbo asen taküm aser kibong dang masü saka kin rangben ya tangari akümtsübutsüsa alitsü kanga nüngdaker. Ajisüaka, asenok akümtsübudaktsütsü asoshi asenoki tangar nem ozüng agütsütsü makok. Tangar nungi akümtsübu yabo tangar tsüngdang asenok putepa aliba, tangar dang temeim mapa inyakba, asen mapa nung ochishia aliba aser shitak inyakba ajanga arur. Tanü tangari asenok akümtsübutsü melen mezüngmeshira, ibaji tangar tai masü saka asenoki timi maliba ajanga mezüngmeshir asütsü. Tanü ama Nagaland nung tebilemtsü agi sünger shisatsü aser rongsen nüngdakba mapang, tangaribo Aortemi kechi ashir ? ta metetnüa atar. Ajisüaka, idangji shisatsü tajungbo kecha magütsütetter aser tangar tsüngdangbo olaa madoktetter saka asenok o asenok nabo kenyongi maochitepi kati ka aitsütepa raratepa  dang mongra, iba alijak nung tangar tsüngdang Ao kin maksüji aji asütsü ! Iba ama maksü nungi asen kin kümzüktsü atema shibai asen kin aser nübortem meimer pai mesüra parnoki aremzüktsüla.