Shibai Kibuba tenüng asangtsü – T. Ken 106:1-5

“Shibai Kibuba mapa tulu indang shitettsü, mesüra Pa nüngsang ajak shibai sangdongtettsü?” (t.2).
Shibai atangji nung Kibuba tenüng asangtsü? Shirnoki Pa dang tashi angar parnoki sangtettsü. “Shirnoki ochiba benshir, shirnoki mapang ajak nung shitak inyaker, parnok temoatsü” (t.3). Asenoki Kibuba den jajara aser Pa dang tashi angara, idangji asenoki Pa tenüng sangtettsü aser Pa tesüngmangtsü mapatem indang jembitsü.
Ano, shirnoki Kibuba tenüng nung jadir Pa tenüng asangtsü akok. “Ne nübur tsütsü, ne yimli sayudang, ni bilemtetangma, O Kibuba ne tekümtet agi ni semdangangma” (t.4). Shirnoki sarasademer parnoki tenüng asanger. Shirnoki parnok taküm nung Tsüngremi inyaktsü asoshi sarasademer parnoki Pa mapa nung pelar.
Tatemsa, shirnoki Pa tenangzükbatem nung amanger parnoki Kibuba tenüng asangtsü akok. “Angji ne teshimtetpur azükaruba ni ngutettsü, angji ne tepela nung ni pelaseta litettsü, angji ne senmang den ni sentsüwangshia litettsü” (t.5). Tsüngrem Pa nübur dang Kanan nung senmang ka akatsü nangzük, aser Pai ibaji parnok nem agütsü. Tang asenok senmang Khrista nung kar. Asenok chubatem dang nungi takaba lir, aser asenoki iba senmang dangi aotsü akok. Asenoki Pa tajung aser tepela lemsateper, aser kenü asenoki Pa sentsüwangshi nung lemsateptsü. Asenoki tanü Pa tenüng sangdi.
Shirnoki tashi angar, amanger aser Kibuba dang ajar parnoki Tsüngrem mapatem metet. Parnoki Tsüngrem mapatem metet. Parnoki Yisu Khrista nung parnok senmang akanger. Na Kibuba tenüng asangertem rong nung atener asü? Nai ne senmang meshia lir ma?