Shibai Modi melentsü ?

Tang nungi anogo 100 tsüngda linük nung Lok sabha election agitsü. Iba election yabo taoba election ama masü saka telok ana küma lemdanger tokteptsüla amai kümogo. Telok kaji BJP-i aniba telok asütsü aser kaji BJP telok anemba telok asütsü. Joko, election mapang atonger asünungji telok anapronglai election sentong yanglua nübortem den jembi tenzükogo. Item sentongtem rongnung yakanü Honibar nü Kolkata nung Trinamool Congress lenir aser West Bengal Chief minister, Mamata Banerjee-i BJP anemer teloktem jatepa lokti senden tuluka alibaji tetenzüker asütsü. Iba lokti senden nung BJP anemer telok Congress, Trinamool Congress, Samajwadi Party, Telugu Desam aser Aam Admi Party teloktemi anir yimten telok 23 tashi den nübor lakh aika adenshia shilem agibaji BJP asoshi tayongzükba tuluka asütsü. Taoba 2014 election nungbo BJP-i aniba teloki anguba takokji kanga tuluka liasü, kechiyong India nüchiso nguli nungi yimsüsüa aruba Congress telokia Lok sabha nung opposition telok asütsüa metemsüi tamakok angu. Ajisüaka, taoba küm ka tsüngda India nung election agibatemji reprangdangra, BJP telok talulen aser Congress telok tatulen ta atalokyonga aoba angur. Ibaji kodang apidangdir taruba election nung ya Congress teloki takok tuluba angutsü amai asadangtetter. Ajisüaka, iba jagi BJP-i aniba teloktem tashimait ta masü saka BJP telokia taoba küm pongo tsüngda linük ajaklen Lotus naro kanga junga pongdakja ogo. Ano BJP asoshi tajung kaji nübortemi parnok nem ano government akümtsüsa maongka agütsüra Narendra Modisa ato kilonser asütsü aser taoba küm pongo tsüngda yimsüsüa aoba kasa sentongtem ano maneni aotsü. Anungji, taruba election ya Narendra Modi aginür o maginer na tsüngda toktepba tongpang ka asütsü. Iba tongpang nung Narendra Modi maginürtem asoshi shisabolutsükaji tang tashi parnok rongnung ato kilonser shiba asütsüar meshimtetteter. Tamil Nadu nung DMK aser Bihar nung RJD telokibo indangindanga BJP anemer teloktem rongnung lenirji Congress telok asütsüla aser ato kilonser asütsü atema tang yongi Rahul Gandhi shimteta atatsüla ta yimjak nung metetdaktsüogo. Ajisüaka, iba tebilembaji kasa BJP maginer teloktem nungi Samajwadi Party, Telugu Desam Party, Bahujan Samaj Party, Trinamool Congress aser Nationalist Congress Party purtemi magizüker. Tetezü, parnok bang nungi madokyonga item telok lenirtem nungia ato kilonser kümnertem lir. Yakanü Kolkata nung parnok senden nunga parnok mapaji tamasa BJP telok tsükdaktsütsü aser külenang ato kilonser shimtsü ta aikati metetdakja liasü. Atangji, BJP telok anemertem asoshi shiba ato kilonser asütsü ta asübaji tongtibang masü saka BJP telok akoktsübajiang tongtibangba lir. Ajisüaka, ano election nung takok angu nunga shiba ato kilonser asütsü ta asübaji memeteti election nung longjemer tokteptsübaji nübortem asoshi lenir tejangja ka mali anidaker asütsü, anungji tetsüintsüka asütsü. Atangji, Andhra Pradesh nungi DTP lenir Chandrababu Naidu, UP nungi BSP lenir Mayawati, Maharashtra nungi NCP lenir Sharad Pawar aser West Bengal nungi TMC lenir Mamata Banerjee nungertemia ato kilonser kümnüa bilema alitsüa akok. Item rongnung Sharad Pawar aser Mamata Banejee nungertem yabo Indian National Congress nung tongti shilem agia intetba purtem lir. Taoba election nunga BJP asoshi kasa tebilemtsü liasü, kechiyong aikati L.K. Advani-ang ato kilonser asütsü südi ta bilem saka tesüsa Narendra Modi shimtet. Taoba küm ka ana tsüngda election agibatem asadangra BJP asoshi teimla kangabo mali saka ano BJP anemertem telongjemji reprangdangra mapang tongerbo kechi akümtsüar mametetba jenjang ka nung lir. Iba ama yimten tensa ka nung Congress teloki BJP maginer teloktem den metoktepi shisa tajung agüja anira, aginüyonga maginüyonga Congress telokisa menden teimba angutsü aser Modi  melen Rahul Gandhi shimtsüsa akümtsü.