Shibai yanglutsü ?

Nagaland nung mapa kata shitak inyaka moutet angudang, atangji, nisung ajak kanga tezü atanger. Ibayongji, Nagaland ya kati ka aitsütepa nüngsen jembiba lima ka dang kümogo. Nübortemi government aitsür aser government nung alirtemi nübortem dang taküm yimya melenshia ochishia alitsü kenüamati ajungshir ta shibai shiba aitsüar memetet ajak akoksadagi. Iba ama tensa tia ka nung, Nagaland nung terenlok mapa inyakbatem reprangdangra, kata shitak inyaka mangutsü. Aji oda, tsümar company tulutem nem terenlok mapatem inyakdaktsü nunga mapa kata shitak meinyaktetter aser asen nisungi inyak nunga tamajungba-ang inyaktetter ta alima nung Nagaland ajungtsü atema inyaktsü purbo kata mali ama temulung shia bilemer. Iba ama pei lima renlokner saka merenloktetter ta kangshiba mapang nungya Naga nunger lanurtemi Naga lima tasen ka yanglutsü asoshi kanga süoki ia bilemtsüla. Asenoki jungjunga bilemdangra, asenok sensopurtemi pei lima memeim nung shibaibo meimtsü ? Asenok sensopurtemi Nagaland renloktsü asoshi inyakba mapatem nung shitak meinyaker nung kodaser tangari junga inyaktsütsü ? Temeim mapa inyaktsüji pei kidang nungi tenzüker ta jembiba amato, pei lima asoshi terenlok mapa inyaktsübajia pei mulungjang aser pei teka nungi tenzüktsüla. Kechi mapa südir süaka shitak aser jungjunga inyaktsübaji temeim nungi tenzüker. Aji oda, asenok dak pei tetsü tasoli meimba shisatsü mali tashi asenoki jenjangpong kata shitak meyanglutettsü. Pei tetsü tasoli meimba purtemi pei tetsü taso lima asoshi pei taküm agütsütsüa mapayur. Parnok jagi pei ajung masar aser pei kija ajangzüktsü memeranger. Pei tetsü tasolima meimertemi pei lima merenloktetba tiaji taaktsüka bilemer aser pei lima nung sensaker aser makamaitertem alibaji pei tamakok amato bilemtsü. Iba ama pei tetsü taso lima meimba shisatsü aser tangatetba aliba purtemi pei nübortem tajemrepba aser sensak tia nungi nüchiso agütsütsü meranger. Tanü Nagaland yanglutsü asoshi iba ama pei tetsü tasolima meimba shisatsü adenba lanurtem nüngdaker. Atangji, alima yanglushitsü asoshi taintem menüngdaker ta masü saka taintem dang nungibo tai maket aser pei lima asoshi tajung inyaktsü bilemba lanurtemi tajungba inyaktetter. Joko, asen lima yanglushidi süra tamasa asenoki asen tetsü tasolima tama meimtsüla. Kodang asenoki asen lima meimdir, asenoki asenok kija takar akümtsü memerangtsü, asenoki asen kija ki tajung nung chiyongtsü tajung chia anisüngzüka aliba nung jangramatemtsü. Senso tajung ka asoshi pei nübor alaashia yutsür pei kija chuba ama aliba jenjang agi nümadanga mebilemtsü. Aji oda, tanü asen Nagaland tia ya ngur pei lima meimba senso ajaki akseta bilemtsüla aser temulumg shia ajeptsüla. Asenok lenmang tamajung nung jajaba, taneptsü bushii sen apua bener bendang limai aoba, asen lima nung kaketshisatsü tajung mengutet timtemseta bendang limai kaketshisatsü bushii aoba aser asen lima nung light junga maruba agi aser tensa majungba agi business junga meinyaktetba agi tezüdanger asen lima toktsür tangaleni moutettsü. Aji oda, koka aliyonga, pei tetsü taso lima meimertemibo pei lima majungba agi tanga lima nung oa malitsü. Joko, Nagaland nung ya inyakyim ajak teraksatsü tashibo raksaogo, anungji asenoki inyaktsü anünga aliba mapaji yanglushitsüba dang anünga lir. Iba ama mapang ka nung, asenoki government nung alirtemiang asen lima yanglushitsü amai bilemra kodanga mataloktsü. Kasaji government nung alirtemia asen lima yanglushitsübaji nübortemiang yanglushitsü amai bilemra tali teraksabaang akümtsü. Asen lima raksaa aliba yanglushitsüba yabo senso ajak kasa khuret aser tebilemtsü lir. Parnoki yanglutsüla ta masü asenoki yanglutsüla ta asenok dak tangatetba tasen ka alitsüla. Atangji, tuluka raksaogo saka yanglushitsübajibo tuluka nungi metenzüktsü. Kenü asenoki asensasa taia ta bilemba mapa tilaka meinyak aremra aser junger ta asüba mapa nung shilem tilaka agi tenzükra, idak nung jagi tenzüker asenoki asen lima yanglushi tenzüker asütsü.