Shibangba mapang tekülem sentep magitsüla

Dimapur, March 31 (TYO): Linük den külemi March 24, 2020 ayaterm nungi tenzüker anogo 21 atema Nagaland ajunga shibanga lir aser iba ya Novel Coronavirus (COVID-19) prokshiba azüoktsü atema ozüng agütsüba lir, ta Nagaland Home Commissioner, Abhijit Sinha, IAS-i Mongulbarnü nenshia metetdaktsüogo.
Iba shibangba mapang, lokti adenshitsü memelar aser iba nung tamangba yimsü sentep agiba dena lir, kechiyong lokti adenshiba ajanga virus prokshitsü aser nisungtem taküm lendongi idaktsütsü, ta Home Commissioner-i ashi.
Ajisüaka, Deobarnü arogo kari tekülem sentep agiba osang angazüker aser iba nung Public Health & Safety atema lendong tulu keta lir. Anungji, arogotem dang Public Health & Safety nung ajemdaker iba shibangba mapang lokti adenshia tekülem sentep magitsü nenshia metetdaktsür, ta Abhijit Sinha-isa shisem.