Shidi ka ajanga Anna Hazare mokmerenogo

Mumbai, August 11 (Agencies): Social activist, Anna Hazare dangi amokmerenba shidi ka aruba sülen pa nem security akhanga agütsüogo, ta police ketdangser kati metetdaktsü.

Iba shidi nungji Anna dang, pai Delhi Chief Minister Arvind Kejriwal den tesentaktep meraksara pa tepsettsü, ta amokmerena lir.

“Onoki August 7 nü shidi ka ngua lir, koba ajanga Hazare-i Delhi Chief Minister Arvind Kejriwal den tesentaktep meraksara pa tepsettsü ta amokmerena lir,” ta Hazare den külemi inyaker Datta Awari-i ashi.

Iba dak sentakba nung Ahmednagar district, Parner police station nung IPC section 506 kübok ken o ka benokogo, ta Parner nung police ketdangser kati ashi.

“Iba shidiji August 7 nü zülu aser timba ka English oshi nung zülua lir,” ta ketdangserisa ashi.

Iba shidi nungsa Hazare amokmerena, küm ana tejaklen Pune nung Nationalist, Narendra Dabholkar tepsetba ama pai-a kasa tia ajurutsü, ta shia lir.

Shidi nungsa Anna dang, pa par yimtsüng, Ralegan Siddhi adena maotsüla ta zülua lir, ta police ketdangserisa shisem.