Shidi sen aser senjang mamshiba linük ka kümdi: Modi

New Delhi, November 27 (Agencies): Deobarnü Ato kilonser, Narendra Modi-i India linük ya shidi sen mesüra senjang mamshiba linük ka akümtsü atema ayongzükba den külemi sen aika indang notes anentsüba ajanga miima aliba rongsen aser ochimashi anentsü, ta metetdaktsü.
Ita shia radio sentong “Mann Ki Baat” nung jembidang Modi-i nüburtem dang digital economy indang angazüka pei mobile phone temji banking oset ama amshitsü ayongzük.
“Nü bank account aser internet banking indang angazükang. Nü indang phone nung bank balala indang apps amshitsü angazükang. Sen cash mamshii shishilembatsü angazükang. Cards aser tanga electronics ajanga payment indang angazükang,” ta pai ayongzük.
“Onoki linük nung aayangertem nem bank account lapokdaktsüner, parnok senji item account nung inokdaktsüner, koba ajanga ‘minimum wage act’ mapa küma inyaktettsü. Kodang na bank account lidir, nai mobile phone mashii ka amshia e-wallet amshitettsü,” ta Modi-isa ashi.
Ajaki pei kinünger adianutem, kiyonger aser shishilembartem dang electronic payments indang sayuang ta shia Modi-i, “India nung lanur ajaki ibaji tekaraba nung inyaktettsü aser ita ka tsüngda alimai India tasen ka angutsü. Temelenshi bener arutsür sepai ka kümang. Onoki black money aser ochimashi anema raratsü. Nenok ajanga temelenshi aser asentenshi bener arutettsü,” ta ayongzük.
“Tensa süngjemtsü atema anogo 50 shi agitsü ta ni shiogo. Küm 70 tashi ochimashi aser black money tebilemtsü ka anentsütsüji kanga tezüba masü,” ta paisa ashi.
“Sen tamshidak anentsüba sülen alimai reprangdar aser economist temi asadangdar. Ya koma inyaker aser iba tensa nungi koda adoktsü ta parnoki reprangdar. Alimai arendaka reprangtsü akok, saka India-ibo temulung lema lir,” ta Modi-isa metetdaktsü.