Shidi sen noktangba anema shishilembartemi lungkak ait

Guwahati, January 29 (Agencies): Demonetization anema linük ajunga nung longkak aitba den külemi, Honibarnü Assam nunga shishilembartemi longkak ait.
Centre aser state sorkartemi shidi sen mamshitsü asoshi sentong aika yanglua inyakba ajanga süngulu nung inyaker nisung lakh aika timtemdaktsür, ta Assam nung aliba shishilembartemi sorkar aija ashi.
Bank, insurance, railway aser telecommunication sector nung inyakertem den külemi INTUC, CITU, AITUC, AICCTU, AIUTUC aser HMS züngsemtemi iba longkak aitba sentong ya Dighalipukhuri ayongküm nung agi.
“Demonetization ajanga Assam nung tilateri shishilembartem lakh aika timtemtaki. Bank ajanga yimtsüng ajunga tonga aotsü mapa tasak lir aser iba mapang sorkari shidi sen mamshitsü asoshi sentong balala inyakba ajanga state nung süngulu nung inyaker, ATM card mamshitetertem taküm kanga timtema rokongdaktsür,” ta Assam CITU committee nung tongti zülur, Tapan Sarma-i osangbener dang ashi.
Longkak aitertemi Dighalipukhuri ayongküm nungi jajatsü tenzükba mapang police temi nokdangba ajanga tensa mejungi aküm.
Assam nung INTUC tongti zülur, Kirti Kamal Nath, Assam AITUC Tir, Munin Mahanta, Assam HMS Tir aser taoba mapang Assam education minister, Ramani Barman, Assam AICCTU Tir, Subhas Sen aser AIUTUC lenir, Prabhat De nungertemi iba longkak aitba sentong ani.
Demonetization sülen sorkar ajanga ochimashi sen kwika puteta lir, item senji nüburtem nem metetdaktsütsüla, kechiyong iba sen nüburtemi metettsü asoshi nüburtem dak temeten lir, ta parnoki sorkar dang yimyim ayimoktsü.
Shidi sen mamshitsü sentong takok angutsü asoshi sorkari yimtsüng ajak nung ATM inoktsütsü asoshi parnoki sorkar nemssa takhangba agütsü.
“Ochimashirtem merenshitsü asoshi nüburtemi demonetization pusemer, saka shishilembartem takoksa ajurur. Mapa inyakertem aser shishilembaba tila tenzüka alirtem shidi sen peria maliba ajanga timatemer. Ibai BJP-i aniba sorkar nükla tajungji asü?” ta shishilembar telok nung züngsem, Madan Talukdar-i sorkar dang asüngdang.