Shiküp nung zülua aliba Isaia Ainkar kaket ngutetba otsü.

–  S. Medem Kichu, Lerie Colony, Kohima.

Iba otsü indang ya asenok aikati metetnüa alitsü ta bilemba agi Dr. Anis A Shorrosh-i züluba kaküt “Jesus Prophecy and the Middle East” kaküt nungi agiteta adoktsür.
Küm 70 (Seventy) shi süia ago, 1947 küm Lümlowa mapang ka nung Arab nunger tebur chanu ka tenüng agi Muhammad adh-Dhib ta sür künü anogo tasü Tzüyim (Dead Sea) khüm anasa par san telok chimdakja anir senzüa liasü. Iba mapang nung ajungbena  dang san ka Longki kati tsük. Pai iba Sanji temai adokdaktsütsü mechi, longki jagi long ka ondaktsü aser pai repranga ali nung iba long jagi ano chipo tazüng mesüra osüt kar dak onshir amai angashi. Pai iba olaji jungjunga angadang nung iba long to agi ali chipo dak aouner chakrüpba ola angatet. Pa kanga dang aoksa, saka teimla tulu nung, oda iba Longki nung ya akhi mapang nung amshiba tejen osüt kar alitsü ta bilema tenempanglak jagi tur anguoka reprangdang nung ali chipo eshika amentepa angu. Ali chipoji kewika lir aji metettsü atema pai Longki telong jagi ir anguoker reprangdang nung tali tammang asüba agi pai junga mereprangtet.  Aji dang masü, tali tammang asüba jagi pa tsübuadok. Aji asü nung pai Longki nungi meyiba adoker par kidangi dang oadok, aser tebu tanubo dang pai anguba ajak indangji ashi.
Tasüngnüpji tebu tanubo tena yakta dang Longki to agi arur telong jagi apua idang nung idakji ali chipo ter sür ana (12 in No) amendaka liasü. Itüm rongnungji ali chipo ka nungbo shiküp nung züluba  kaküt ka mesüka kodanga raksa-a maotsüba sü (cloth) ka nung alüper liasü. Tenai ibaji bener adoker Bethlehem yimti ung Tsüngsem yunglur aser osüt tejen rezünga ayur ka dang ayok. Iba nisung jagi ibaji Yirusalem yimti nung St. Mark tenla kidang bener oa ita eshika yua lir külen ano chipo tamungba ajak to bener arur iba ya kechi züluba ar aji metetsü atema America lima (U.S.A) nung American School of Oriental Research nung Director-ba dangi 1948 küm bener yok.
Iba school nung professor, John C. Trever-I ibaji tending. Pai anogo pezü aser aonung pezü nü tashi nung Noka tangoka ajakji tending. Aser pai iba shiküp kaküt ya asadang nung, metong nung feet 28 talang liasü. Pai mapa ajaki tümpanger külen, tesüsa iba ya Isaia Ainkar otsü ajunga züluba kaküt ta bushitet.
Isaia Ainkar mapangji Laishiba nung ashiba agi, pa ya  BC 740 meta  ka nungi aliba angur. Iba  mapang nung teka agi zülua toktsüba tang tashi nung meraksai anguba ya  tesüngmangtsü ka lir. Otsü zülur-i ashiba agi, ya par limaji mopong kanga dang takong aonba lima(extremely dry climate of the region) ka asüba agi tang tashi meraksai lia angu ta ashir. Pai ashibajia shidak dang lir, saka mopong takong lima ka asüyonga küm 3000 jungnüa meraksai aliba ya atangji Tsüngremi, Pa tesüngmangtsü mapa asen meimchir dang jungkai adoka sayuba ka lir ta kanga dang süngmangseta bilemer.
Tsüngrem iba otsü azünger ajak moajang.