Shilepertem

Nagaland nung shilepertem ajak majung ta ser iba yimobilem zülur masü saka shileper kari metetsümonga aibelenba, angbangyim mapa inyakba aser talirtem külakoktsüba osangtem kar angazükba den kuli kar anguba nung ajemdaker iba tebilemba zülur. Dimapur nung alir asünung, iba jila nung ajemdaker shilepertem indang onük lemsateper saka ashiko, tanga district tem nunga Dimapur nung atalokba amaji atalokya alitsü akok, anungji tazüngertemi iba osang prokshia tangatetba nung anünga alirtem angatetdaktsütsü ayongzüker. Asenok Naga nungertemi shi kanga sapu achir aser asenok aikati shi medenibo chi mechiyungnür aser asenoki shi kanga sapua achiba ngua tangartemia asen jilu ajizüka shi achir. Reprangdanga ora asen state nung arua alir tsümar aikati asenok ama shi achitsü jangrar aser nashishi machirtemi aser akshi machirtemi parnok külem nisung dang miima item shi achitsüsa asenoki parnok sapua kümdaktsür. Tanü-asüng Dimapur nung alirtemi Dimapur nung masü saka luagi Assam nungang shi alitsü atema alur. Dimapur nung shileper peria dang lir aser ano shi ayokdak tajungtem aika lapoka lir, saka kodaser Naga nungertemi Assam nungang lua shia alitsüsa akümer ta metetnüa bushidang, kuli kar angu. Mezüngbuba kuli; shileper kari shi seret aodang talir nem memetetdaktsüi shi tamajung mesüra endokenra kar teka nung miimbanga amer seret aoudak enoker ayoker. Tanabuba kuli; shileper karibo taliri magitsü ta shidakmonga, parnoki maginüba mesüra mechinüba shilemtem enoker ayoker. Tasembuba kuli; shi ayokdak shi aliba sülen, tanga dokan ka nung oa seret odangdang shi touzük shitak malir; Pezübuba kuli; khen khen touzük shitak maliba atema mesüra shi tamajung enoktsüba atema ola adokdang shilepertemang tesashiba kümer talirtem amokmerena merenshir. Ibala tatalokba ajanga aser item osangtem angashiba ajanga nisung aikati Naga nunger shilepertem dak tamang makar aser iba jagi Assam nungang lua shi alir, kechiyong idakjibo asenoki koba shilem aginüdir agütsür, aser seret-a shitak dang ayoker ta parnoki ashir. Asenoki kanga junga shisadangra, iba nung rongsenren tsütsü takoksa ajurur aser takoksarji asenok Naga nungertem lir, kechiyong shi alitsü atema Assam-i aluba ajanga Naga nunger shilepertem akhi ama shi meyokteter aser ano külen Assam-i alubaji odang alur masü saka gari nung totzü ronga mesüra sen taa agüja ang lur-atur,anungji ibajia takoksasa lir. Anungji, Nagaland nung aser talisa Dimapur nung shilepertemi kanga dang ochishia aser nendaka shishilembatsüla. Tetenzük nung ashiba ama shileper ajak majung ta tai tongloktsür masü, saka kar majung lir aser nenok tangatetba aser inyaksangshi melenshitsüla. A. Shin 10:2 nung, “Tamajung agi ajangzükba rongsenji kecha tajangzük mali. Saka temeshibai tasüba nungi kümzüker.” aser ano A. Shin 1 :11 nung, “Ochi meshi-i anguba rongsenji ajema akümtsü; saka züsenba agi terara shibai bendendir, pa züintsü.” ta ashir, anungji Tsüngrem tsübua aser Khristan tajung ka ka ama asenoki shishilembaba mapa inyakra, Tsüngremi asenok memoatsüi ang malitsü.