Shillong Chamber Choir CAG-i bushisüngdang

March 24, 2016 : India nungi chamber choir telok ‘Shillong Chamber Choir’ (SCC) ya 2001 küm tentet. Parnoki October 2010 nung India’s got talent (Season 2) tetoktepba nung takok anguba ajanga kanga nüngtugu aküm.

Iba telok ya India aser bendang linük aika nung shilem agia jajaba ajanga Meghalaya State nem konang nungsang jenti bener arutsüogo. Ajisüaka 2012 küm Cincinnati, USA nung July 4 nungi 14 tashi ‘World Choir Games 2012’ nung shilem agitsü aodang state Arts & Culture department-i sen teyari agütsüba melena parnoki US nung Meghalaya state tenüng ajungkettsütsüla ta Chief Minister-i tetuyuba agütsü, saka parnoki yamaji meinyak, ta Comptroller & Auditor General of India (CAG)-i bushisüngdanga ngutetba osang ajanga ashi.

Ministry of Culture, Government of India-i ‘Scheme for Promoting International Cultural Relations’ inyakyim ajanga iba ama shilem agia jajar nem sen lakh 0.75 mesüra tayimtsü ticket jenjang dalangtiba sen kwi ibaji parnok nem meyipa agütsür.

Ajisüaka state Arts & Culture department-i parnok indang boarding passes mesaruden aser iba den külemi parnok nisung pongu business class nung amena indangbo kecha osang magütsü.

Business class nung amenertem shia ticket sen lakh 2.88 nungi lakh 2.92 tashi lir aser tanüngba parnok nisung 17 bo sen lakh 1.03 nung lakh 1.86 alang economy class nung amen.

Mongulbarnü CAG-i State Assembly nem osang agütsüba agi, January-February 2015 itatem nung Directorate of Arts & Culture Shillong-i August 2011 nungi December 2014 tashi indang audit agiba nung SCC tem aieni aodang sen lakh 39.22 entokba sayua alibaji reprangdangdang tashi mait tera putet.

“Cincinnati, USA nung World Choir Games 2012 shibangba sentong nung adeni aotsü atema Shillong Chamber Choir (SCC)-i sen teyari atema mepishia züluba shidi dak sentakba nung State CM-i June 2012 nung parnok oli aruli ajak state sorkari agütsütsü aser SCC-i iba melena US nung Meghalaya tenüng ajukettsütsü tetuyuba agütsü,” ta CAG-i ashi.

Anungji jembiba ama SCC-i International Stage Choir shilem ka ama World Choir Games 2012 shibangba sentong nung oa shilem agi.

Iba sentong asoshi parnok tayimtsü nung oli aruli jajadang state Arts and Culture Department ket nung sen lakh 39.22 entoka liasü.

Sen entokba alang Chief Minister-i parnok shilem agidang Meghalaya tenüng ajungkettsü tuyuba ama parnoki inyakba kecha nunga sayua mali, ta CAG-i ashi.

CAG osang ajangasa ashiba agi, Meghalaya Travelling Allowance Rules, 1985 nung pa/la iba ama aienlen jajaba mapang entokba sen ajak TA agütsütsü atema boarding passes kanga junga bendena ayutsüla ta shia lir, ajisüaka state Arts & Culture Department-i ibaji meinyaktet.

Arts and Culture department-i travel claim ji economy class tashi atema danga yanglu asübo sen lakh 5.22 kümzükteter lila.

Parnok iba sentong nung adenba kija agi state tenüng ajungketer kechiba süra parnok Meghalaya tenüng nungi ao aser tayimtsü class balala nung amenbaji seat peria mongutetba ajanga yamaji asütsüsa adok, ta iba dak sentakba nung sorkar-i December 2015 nung tuteta ashidang parnok indang boarding passes ji kong ayuar mangur, ta shisem.