Shillong nung consultation senden amen

Shillong, Rongjui/September 22 (Agencies): Northeast India nung human trafficking (sex & bonded labour) dak sendakba nung 2buba Regional consultation senden menogo; iba sentong ya Nagaland State Legal Services Authority (NSLSA) aser Meghalaya State Legal Services Authority (MDLSA) kübok International Justice Mission (IJM) & North East for Child Rights-i ayongzüka tanü Yojna Bhavan, Shillong nung agiogo.
Okila jembidang Meghalaya High Court Chief Justice aser Patron-in-Chief MDLSA, Mohammad Yaqoob Mir-i, 2013 küm IPC nung Arrla 370A bendenlokogo, koba ajanga shibaisa meteta mesüra amemeteti tanur shibelendir, tanur dak azüapong benshidir tajemba agi küm 5 tepoukdak ayutsü, aser ibaji küm 7 tashi akumtsüa akok aser senchi-a achitsü, ta metetdaktsü.
Paisa, mapang mapangshia tayongzükba tasen balala adoka ozüng alema inyaker, yamaji ozüngtema tesashiba yanglushir, ajisüaka item ama ozng alema inyakba manener, ta ashi.
Iba dak sendakba nung pai, kechi kuli ajanga ozüng alema inyakertem menokdangteter, ta asüngdang.
North East India nung nisung shibelenba dak sendakba nung tesasaba oalen ka lemsatepa Justice Mohammad Yaqoob Mir-i, North East ya India nung nisung shibelenba tiyongtsü ka kümogo; nisung shilelenba kulitemji mapa manguba tebilemtsü, sensak tia aser mapa bushia tangaleni aoba kulitem ajanga lir, ta ashi.
Paisa NE nung Victim of Crime Compensation Scheme benoka inyakba mezüngbuba state, Mizoram nem tenüngsang agutsü.
Paisa, Nagaland nung nisung shiabelenba mali ama tema nungbo repranger, ajisüaka junga reprangdangra nisung shibelenba tera yangdar, ta ashi.
Kasa sentong nung Justice Arup Kumar Goswami, Chief Justice (Acting) Gauhati High Court & Patron-in-Chief Nagaland State Legal Services Authority-ia jembia liasü.
Sentong nungsa Sanjay Macwan, Regional Director IMJ, Mahendra Singh M. Sengar, Senior Consultant IJM & Convener NEFCR nati osang balala metetdaktsü aser W. Diengdoh-i (MJS Member Secretary Meghalaya State Legal Services Authority) lokti pela agizükba o jembi.
Sentong nung Sunitha Krishnan, General Secretary Peajwala Hyderabad-i ‘care and protection of victims of human trafficking’ onük jembi, Davis Marak, IPS, Supretendent of Police East Khasi Hills District-i ‘Role of Police in Human Trafficking’ onük jembi, Mezivolu T Therieh, NJS Member Secretary NSLSA-i ‘role of SALSA in dealing with human trafficking cases in NE’ onük jembi aser Mahendra Singh M. Sengar-i ‘Status of human trafficking in NE’ osang metetdaktsü.
Iba senden nung NE state 8 nungi State Legal Services Authorities, District Legal Services Authorities, Child Welfare Committee, Police Department, CHILDLINE, Social Welfare aser Shillong Law College aser NEHU nungi parnok ajak agi züngsem 230 aden.