Shillong nung curfew maneni lir; Army-i flag march agi

Shilliong, Aami (June) 2 (Agencies): Tanü agi anogo anabuba Shillong nung curfew ozüng agüja lir. Tatalokba ka nung Superintendent of Police (City) Stephan Rynjah yiru aser pa Shillong Civil Hospital nung anepaludar.
Lendong balala nung police dena nisung 10 shi yirua lir aser nisungtemi state sorkar dang Motphran tesem nungi ozüng alema arua alirtem anienang ta akhanger.
Tanü Motphran nung nisungtemi police dak lung agi ona rara aser lungkak aitertem senshidaktsütsü atema teargas shells amshi saka nisungtemi injang khaloktsür ta bilem, ta police ketdangser kati osangbener dang ashi.
Army-i Shillong tesem kar nung flag march agiogo. Parnoki Rogonü (Hokolbar) nikongdang Motphran tesem nunga flag march ji agia liasü.
“Army renema lir aser tensa mejungi kümra parnok mala lemzüktsütsü. Tensa ano mesüngjemi lir saka azüoka lir” ta East Khasi Hills district Deputy Commissioner, Peter S Dkhar-i metetdaktsü.
Yashi Chief Minister Conrad K Sangma-i temaba jenjang nung senden ka ayonga amen aser iba mapang pai Shillong nung alirtem süngjema alitsü aser tensa tajungba kümdaktsütsü ayongzük.
Yangtepnü (Brihostibar) nikongdang Shillong kübok Them Metor tesem nung alirtemi bus handyman ka dak teka sangshiba sülen rara adok.
Social media nung handyman ji süogo ta olulu prokshiba sülen tensa tamajungba aküm aser bus driver telok ka Them Metor tesemi orr raratep. Iba mapang police-i teargas shells amshia telokji senshidaktsü.
East Khasi Hills district-i aonung 10:00 ako nungi anepdang 5:00 ako tashi Shillong ajungalen curfew alitsü ozüng agütsüogo.
Local nisung ka teka sangshi ta tai tonglokja aliba nisung ka police-i pua lir aser police-i pa den yaritepertem aputsü atema bushitepdar.
Khasi Students Union (KSU), Federation of Khasi Jaintia and Garo People (FKJGP) aser Hynniewtrep Youth Council teloktemi local nisungtem dak teka sangshirtem merenshitsü aser Them Metor tesem nungi ozüng alema arua alirtem anientsü atema takhangba agütsür.