Shillong nung Dylan Nobel Prize anguba benjong amung

Shillong, October 17, 2016 : India nunger kentener aser ken zülur, anüdoklen Bob Dylan ta jaloktsür alisang, Lou Majaw-i Deobarnü Shillong nung America nunger kentener aser ken zülur Bob Dylan-i Literature nung Nobel Prize anguba atema tetushi agütsüba sentong nung ken atenba noksa nung angur.

Shillong. October 17, 2016 : “India’s rock capital”, Shillong-i anir America nunger ken zülur aser kentener Bob Dylan Literature nung Nobel Prize anguba tetushi agüja benjong amung.
Deobarnü Meghalaya yimtiba nung aliba Cafe Shillong aser Cloud 9 tesemtem nung Dylan-i atenba “Mr. Tambourine Man”, “Blowin’ in the Wind”, “The Times They Are a-Changin” kentem den ano pai atenba ken tanga aika tena liasü.
Literature tsütsü sempet tulu angusang tushitsü atema India aser Europe tesemtem nungi Dylan sapurtem yangi adenshidakja benjong mungtettsüsa sentong yangluba atema anüdoklen Dylan ta jaloktsür alisang Lou Majaw dang kanga pelar.
“Dylan-i zülubatem ajanga alima kanga ajagzükogo. Alimai pa nem iba sempet tulu agütsüba atema Tsüngremi Bob Dylan aser tagütsürtem moajang,” ta Majaw-i IANS dang ashi.
Majaw-i küm shia kentener Bob Dylan tasoba anogo May 24 nü amunger.
“Dylan taküm aliba mapang asenoka lisemba ya temoatsü tulu lir. Pai asenok nem agütsüba atema pa nem tetushi agütsütsü atema asenok yangi sentepa lir,” ta “Mr Tambourine Man” ken atentsü mapang Majaw-i ashi.
Arishi küm 75 tain, America nunger ‘rock legend’, Dylan-i America nunger kentenba yimya nung sangro tetetzü balaka nung amshiba atema iba Nobel prize ya angu.
Iba akhümket award ya America nunger novel zülur Toni Morrison-i 1993 küm anguba sülenbo tangang Dylan-i angurba lir.
Pai küm 50 shi kentena arudang temulung shirangtsü ken, mapang shia yimsüsüba dak sendakba ken aser tangar akhüm metsübui atenba kentem aika tena lir. Alima nung pa sapur nisung million aika lir.
“Dylan atema kecha aika ashitsü mali. Iba café nung adenshia alir ajaki pa temetet dang. Asenok kechi koma nisung ka süaka Dylan-i tan award tulu anguba atema pelatepa amunger aser nia ibaji atema dang yagi aru,” ta Kolkata nungi Shillong tashi tayimtsü nung atusang Rahul Guha Roy-i ashi.
City of Joy ta jalokja aliba yimti, Kolkata nungi Documentary film yanglur, Ranjan Palit-i, “Sangro zülur tulutiba, Dylan nem tenüngsang agütsüba atema ni Lou Majaw aser Shillong dang kanga pelar – kechiba süra Kolkata nungbo shingaia pa nem tetushi magütsür,” ta ashi.
Bob Dylan-i iba jila tila, Shillong yagi arua pai ayangtetba pa akhümtsürtem angateta tenük kuli asütsüla. Pa (Dylan) yagi arua Lou Majaw nem pa ken India lima nem metetdakja taküm lidaktsüba atema tenüngsang agütsütsüla, ta iba sentong nung adener Australia nungi tetongtechi Digby aser Diane Beard narongnung Beard-i ashi.
Dylan ya 1941 küm aso aser pa tenüng shitakbabo Robert Allen Zimmerman lir. Pai 1959 küm nungi Minnesota coffee house tem nung ken tena jajatsü tenzük.