Shillong nung gari rongdoktsüba nung COMSO dena lir: Police

Shillong, February 18 (Agencies): Shillong nung tawa garitem rongdoktsüba lendong nung Confederation of Meghalaya Social Organisations (COMSO) züngsemtemi shilem agi, ta East Khasi Hills police-i metetdaktsüogo.
February 12, 2020 nü Shillong nung mi senoktsüba lendong ana atalok, ta East Khasi Hills nung superintendent of police-i ashi.
Mezüngbuba tatalokba nung Langkyrding, Shyiap nung Maruti Gypsy ka rongdoktsü aser iba sülen Laitlum, Mawlai Mawtawar nung Bolero Pick-up ka rongdoktsü.
Tesem anaprong nungi CCTV footage nung aliba aser tenük kuli agütsürtemi ashiba nung ajemdaker, ML-05-K-9946 nung nisungtem mener arua iba mapa ya inyakba kulitem bushitet, ta SP-i ashi.
Iba ken o bushisüngdanga arudang, mi senoktsürtem rongnung nisung ana- arishi küm 26 tain Banshanlang Marboh aser arishi küm 20 tain Henry Kharjahrin na apu.
Tenaprong ya HYC, Nongthymmai Circle züngsemtem lir aser mi senoktsüba nung shilem agiba nangzükogo, ta East Khasi SP-isa ashi.
“COMSO nung HYC ya dena lir aser parnok züngsemtemi ozüng alema mapa inyakba ajanga, parnoki ILP mapa tenzüktsü atema timi lungkak aiter ta asüba den meputep” ta SP-isa shisem.
Tawa tu COMSO-i ‘direct action’ ta ser lungkak aitba sentong ka tenzüktsü shiogo.
SP-sa ashiba agi, Henry Kharjahrin ya COMSO chairman Robert Kharjahrin den kinunger lir aser HYC tir inyaker.
Paisa ILP benoktsü atema takhangba agütsürtem dang ozüngi memelaba mapa meinyaktsü metetdaktsüogo.