Shillong nung mezüngbuba Naga Day cum Cultural Extravaganza agi

Dimapur, May 6 (TYO): May 6, 2017 nü Shillong nung (NEFS) Naga Elders’ Forum Shillong-i mezüngbuba Naga Day cum Cultural Extravaganza ayongzüka mungogo.
Iba sentong ya U Soso Tham Auditorium, State Central Library, Shillong nung agi.
Naga nunger ajak sabang ka nung longjemtsü nükjidong nung iba sentong ayongzüka agi, ta Naga Elders’ Forum Shillong. President, Tolu Chophy-i sangdong ka nung ashi.
Sentong nung tongti tesemdangerji North East Council Secretary, Ramnganing Muivah IAS aser tetushi tejaokerji Land Resources, Kohima Secretary, Y. Kikheto Sema IAS na liasü.
Ramnganing Muivah-i tongti tesemdanger o jembidang, Khasi nungerji nisung tajungtem rongnung ka lir aser Naga lanurtemi parnok akhümtsübua libalirotsüla, ta tayongzükba agütsü.
Ramnganing-isa Shillong nung aliba Naga nungertemi pei pei kin aser state indang ambassador ka ka ama inyaktsü ayongzük.
Sentong nung tetushi tejaoker Y. Kikheto-i o jembidang, Naga nunger tesem balala nung liakasa, külemi longjemer yimjung nung alitsüla, ta ashi.
Paisa, lanurtem dang pei sobaliba metettsü aser tera ayangtsü atema ajungshi. “Shisakartemi pei sobaliba senzüka meyutsür, saka wazüka ayur. Ajisüaka, wazüka ayuba jagi tangar sobalibabo akhüm metsübutsü ta mangatettsüla” ta paisa shisem.
NEFS-i iba sentong ayongzükba aser Naga nunger longjemer telongjem atema mapa inyakba atema tenüngsang agütsür, ta Y. Kikheto-isa metetdaktsü.
Naga nungertem asoshi tang nüngdakbaji tai tokteptsü aser tesüiba mapang aibelentem amadoktsüba lir. Asenok tsüngda mesüra kidangertem den tsükchitep madokdaktsütsüla asersaka telongjem nung liyonga aotsü asoshi merangtsüla. Tangari atishitsüsa asenoki iba tangatetba nung liteta sayutsüla, ta Y. Kikheto-isa shisem.
Sentong nung NEFS Tir, Tolu Chophy-i tesentepertem pela agizüka jembidang, Naga nunger ajak sabang ka nung longjemtsü atema iba sentong ayongzüker ta ashi.
Sobaliba aser kentenbaren ajanga Naga nunger longjemdaktsür aser iba telongjem ya Shillong nung dang masü saka tanga yimtitem aser state tem nunga belenshitsüla. Longjemtsü atema kija shiai shilem agitsüla aser asenok longjemtsü atema tatok agütsüteptsüla aser tesüibatem amadoktsüla, ta Tolu Chophy-isa ashi.
Iba sentong nung Nise Meruno & Zowe Madrigal, Guru Reuben Mashangva, Tetseo Sisters, Abiogenesis, Patkai Choir, Chonchon, Nimshimphy aser Lhouvirielie Usou nungertemi ken ajanga shilem agi aser Liangmei Cultural Club o Phom Traditional Dance Troupe nati yartsüngsangba ajanga shilem agi.