Shillong nung NSUS 56 buba Freshers’ Social Meet agi

Dimapur, Sept. 28 (TYO): Naga Students’ Union Shillong (NSUS) pur September 28, 2016 nü Naga Community Hall, Shillong nung 56 buba Freshers’ Social Meet ayongzüka agi.

Iba sentong nung tongti tesemdangerji Secretary, Land Resources, Government of Nagaland, Y. Kikheto Sema IAS liasü.

Tongti tesemdanger o jembidang, Y. Kikheto-i kaketshirtem dang ajemalua alitsü aser pei alizüng nung temulung agütsütsü ayongzük.

Paisa, Shillong nung aliba Naga nungertemi local nisungtem den putepa alitsü ayongzük.

“Northeast nung alirtem longjemtsüla aser putepa alitsüla. Iba atema tanga state tem nung aliba Naga nungeri tatishitsü süa sayutsüla” ta pai ashi.

1. Kikheto-isa Shillong nung local nisungtem dang Naga nunger  pei adianu ama züngshitsü mepishia metetdaktsü.

Tongti tesemdangerisa kaketshirtem dang tajangzük angutsü atema kangabo shisa mebulutsü aser ajemalua alitsü atema ayongzük.

Asen Naga nunger loktiliba nung khuret onsara lir, anungji kaketshirtemi loktiliba nung pei nija khuret bener maittsüla. Naga nunger telok ajaki pei aibelentem nangzüktsüla aser ochi atema nokdaktsüla, ta Y. Kikheto-i ashi.

Sentong nung Assistant Resident Commissioner, Nagaland House, Shillong, Pakon Phom-i kaketshirtem dang pie tsüraburtemi imlaba ama taküm litettsü merangang ta ayongzük.

“Nenok züngdaktsütsü atema kidang oagi alirtem senotsü aika endoker. Nenok tarutsü atema tang nenoki meranger anungji Tsüngrem akhümtsübua nenok alizüng atongtsü merangtsüla” ta Pakon Phom-isa ayongzük.

Sentong nung NSUS President, Viyie Kuwtsu-i tesentepertem pela agizük, Mao Christian Fellowship Shillong Chaplain, Kholi-i temoatsü meshia sarasadem aser NSUS General Secretary, Piketoli Z. Muru-i general secretary report metetdaktsü.

Sentong nungsa Shillong Baptist Church Youth Pastor, Rathiulung-i freshers atema sarasademtsü, St. Mary’s Naga Choir-i ken ka aten, Poumai Students’ Union Shillong-i yartsüngsang shilem agi.

2016 Mr & Miss Freshers’ tetoktepba nung Mr Chijanthung Yanthan aser Miss Sungjemtula Imchen nati takok angu.