Shillong nung tensa tajungba kümdar; Police 100 shi yiru

Shillong, Aami (June) 8 (Agencies): Shillong nung tensa süngjema kümdar aser Hokolbarnü ghonda 9 tashi curfew salatsü.
Tanep 7:00 ako nungi nikongdang 4:00 ako tashi tensa mejungi akümba tesem 14 nung curfew salatsü. Iba mapang tatalokba kecha maliasü, ta East Khasi Hills deputy commissioner P S Dkhar-i ashi.
“Tensa tajungba kümogo. Akhi ama shishilembar aser shishilembadak lapokogo aser taxi tem senzüdar” ta paisa ashi.
Tanüngba tesemtem nung aonung 8:00 ako nungi anepdang 5:00 ako tashi curfew maneni alitsü, ta paisa shisem.
Meghalaya yimtiba Shillong nung lisoprtem aser Punjabi nunger tsüngda mepetmesü adokba ajanga tensa mejungi aküm.
Punjabi Lane aser tanüngba tesem 13 nung nikongdang 4:00 ako nungi curfew alitsü, ta P S Dkhar-isa metetdaktsü.
“Onoki tensa tamajung mekümdaktsünür aser lendong ataloktsü akok ta ajiteta aliba tesemtem nung sepaitem mapa lemzükja lir” ta paisa ashi.
Brihostibar nungi messaging services lapoktsüogo aser ketdangsertemi mobile telephone services lapoktsütsü atema asadangdar ta paisa shisem.
Shillong nung aliba Punjabi Lane nung Sikh nungertemi bus handyman ka aser par medemer ana dak teka sangshiba sülen rara tulu adok.
Iba tatalokba atema district ketdangsertemi I Majaw lenisüba kübok magisterial inquiry ka asütsü tetuyuba agütsüogo.
Meghalaya Democratic Alliance sorkaria Punjabi nungertem aliba Sweeper Colony nung alirtem tangaleni belentsü atema lenmang bushiteptsü atema kanga dang temaba jenjang nung luden ka tentetogo.
Anogo 5 nü mepetmesü nung lungkak aitertem aser sepaitem tsüngda raratep.
Them Iew Mawlong nung alirtem anientsü indang onük asoshi Motphran aser Mawkhar tesemtem nung ozüng alema mapa inyakdang police 100 shi yiru.
Tesüiba anogo ishika police 100 shi yiru aser parnok rongnung karbo kanga mejungi yirua lir, ta SP (City), SA Rynjah-i tanü ashi.
Curfew sülen manidakba atema police-i nisung 40 shi pua lir aser nisung 10-15 shi ka police dak lung agi ona raraba atema ken o balala nung tai tonglokja lir, ta paisa ashi.
Lungkak aitertem rongnung tanga district tem nungi liasü aser parnok kodaser iba onük nung densemar onoki mejangjateter. Onoki iba khuret adokba atema kuli bushitepdar ta SP City-isa metetdaktsü.
Dorbar Shnong-i tensa süngjemtsü atema police den yaritepba atema kanga pelar, ta Rynjah-isa shisem.
Lanur asem dak teka sangshiba atema B Miza aser Anil Basi na police-i pua lir, ta paisa metetdaktsü.