Shillong nung Yaba süngjang 3779 apu

Shillong, August 22 (Agencies): ANTF EKH aser DG Assam Rifles indang Intel unit-i Polo, Shillong nung aliba parking lot nung Yaba süngjang 3779 puogo.
Mozüji Manipur nungi bener aru aser Bangladesh-i bener aotsüba lia apu ta police-i metetdaktsü.
Manipur nungi night-super bus ka nung nisung asem mener aru aser parnok ket nung mozüji apu.
Par asemji Surendra Panai, Soilen Hajong aser Rebecca Misao nungertem lir.
Assam Rifles nungi osang ka angazükba sülen parnok Polo nung aliba parking lot jagi ao ta East Khasi Hills Superintendent of Police, Claudia Lyngwa-i ashi.
Yaba süngjang ya heroine dang nungi tamajungba ta züngshir aser chemical drugs asünung substitution therapy kecha mali, ta Lyngwa-i ashi.
Shillong nung heroin shibelenba azüokogo aser iba jagi Myanmar nungi Manipur adena Yaba süngjangtem bener arur, ta Lyngwa-isa shisem.
“Manipur police-i parnok state nung ‘manufactured drugs’ anema mapa inyakba atema pelar. Parnoki manufacturing factory ka nungi brown sugar aser heroine seret 183 puogo aser iba ya tawa Northeast nung ozüng alema shibelenba mozü apubatem rongnung teimtiba apuba asütsü,” ta East Khasi Hills SP-isa metetdaktsü.