Shilpa Shetty-i chiyongtsü kaket ka züluogo

Mumbai, November 04 (Agencies): Bollywood actress, Shilpa Shetty-i ‘The Great Indian Diet’ ta ajaba diet aser nutrition kaket ka züluogo.
“Meimchirtemi pei taküm tazüokba nung alitsü nüngdaker. Ni ya temang tia junga ayutsü mongin ka masü saka nisungeri pei taküm den apetba chiyongtsü tendanga chia ajemtsü kaket ka züluogo,” ta arishi küm 40 tain Shipa-i metetdaktsü.
Laisa ashiba agi, la temang junga ayuba ngua nisung aikati iba indang tasa lemsateptsü asoshi la dang asüngdangba yong lai tan chiyongtsü aser temang junga ayutsü kaketji zülu.
“Nisung aikati ni komala tasa amshia kü temang junga ayur ta asüngdangogo. Ni kü temang ita junga ayutsü atema koba chiyongtsü achir mesüra ni kechisa inyaker ta parnoki kü dang asüngdang. Aji oda, ni tetsü ka akümba sülena kü temang yira maküm aser ibaji ni teinyaktsütem shitak inyakba ajanga ajangzük,” ta lai shisem.
“Ni taküm nung ajangshibatem lemsateptsü nükjidong nung ni kaket ya zülu. India nung anguba chiyongtsü shitak chia ajemba ajanga dang temang shilem junga yutetter,” ta Shipa-i metetdaktsü.
Shilpa-i tan züluba kaket nung pei kidang tsünüba chiyongtsü achitsü aser India nung anguba chiyongtsütem tendanga chia ajemtsü tajungshiba densema lir.
Nutritionist mongin, Luke Coutinho den aroki züluba ‘The Great Indian Diet’ kaketji World Nutrition Day, November 19 nü sayatsü renema lir.