Shimla agi Shyamla melentsü benoker

Shimla, April 15 (Agencies): Tawa Haryana sorkari Gurgaon aser Mewat nüngja melenba ajanga tanga yimtitema ajungshia tenüng melentsü benoker.
Osang ka ajanga ashiba agi, RSS den densemba telok, Vishva Hindu Parishad (VHP)-i Himachal Pradesh yimtiba, Shimla (akhidang British nunger yimsüsüba mapang summer yimtiba) dang Shyamla ajatsü benokogo.
VHP organising secretary, Manoj Kumar-i Himachal Pradesh Angh, Acharya Devvrat dang state nung tongtibang tesemtem nüngja melenshitsü atema state sorkar aser Centre sorkar den lemteptsüla, ta shiogo.
Dalhousie agi Netaji Subhash Chander Bose melentsü aser Shimla nung Peterhoff building agi Valmiki Sadan melentsü benokba sülen RSS state unit-i tang Shimla nüngja melentsü benoker.
Hindu tentet, VHP-i ashiba agi, item tesem ajunga ya British nunger den sentaktepa lir.
Shimla nung nüngtugu Peterhoff building nung British nungeri yimsüsüba mapang India nung Viceroy aser Governor General aika lia aruogo. Iba building ya 1981 küm kitsükkirong lendong ka ajanga raksatsü.
VHP-i Shimla nüngja melentsü benokba ya iba jila indang otsü aika nung ajemdaker benoker. Iba den külemi district administration indang official website nunga item otsütem lir.
Otsü ka ajanga ashiba agi, Shimla ya ‘Shyamla’ nungi jazük, koba tetezü anüng sentsü ki. Faqir kati Shimla, Jakhu tenem nung lungru agi anüng sentsü ki ka yanglua liasü. Ano tanga otsü ka ajanga ashiba agi, Shimla ya ‘Shyamla’ nungi jazük, koba tetezü anüng sentsü tetsür ka.
Ajisüaka VHP-i Shimla tenüng melentsü benokbaji Congress-ibo ashishir.