Shimla nung Smart Public Transport yanglutsü: CM

Shimla, June 24 (Agencies): Central sorkar-i Shimla yimti ya smart cities indang list nung inokogo aser iba ajanga yimti terenlok nung yaritsü aser Smart Public Transport yanglutsü, ta Himachal Pradesh Chief Minister, Virbhadra Singh-i ashi.
Smart Public Transport ajungketba, tetsüng agi senzür asoshi lenmang yangluba, eco-tourism aser pa-sasa tzü poktetba amala tajungba küma anepaluba inyakyim ya Smart Cities Mission nung tongtipangtiba asütsü, ta Virbhandra Singh-i Hokulbarnü ashi.
Shimla ya central sorkari ‘smart cities list’ nung inokba asoshi iba yimti nung aliba nüburtem tenüng sanga jembidang, iba Smart City tenüng nung yimti tajungba yanglutsü, ta pai shisem.
Iba yimti yanglutsü asoshi sorkar ajanga sentongtem ya Union Ministry of Urban Development nem March 31 nung agüja lir.
Smart City sentong ajanga tajemtsü tzü agütsüba, jana indokba, kilentzü aoba lenmang, urban transport, e-governance, capacity building aser reju balala tashi taitba küma tajungba yanglutettsü, ta Chief Minister-i ashi.
Shimla nung Smart City atema sen crore 2,906 indang project agütsüoko, ta State Urban Development Minister, Sudhir Sharma-ia ashi.
Himachal Pradesh nung Smart Cities Mission atema Dharamsala aser Shimla ya lir.
2011 census nung aliba agi, Shimla nung nisung 170,000 lir aser item nisungtemi anogoshia tzü tamajung litre million 30.09 indoker, ta ashir.
Scientific yimya masüba nung jana reja indokba ajanga British nungeri India nung yimsü asüba mapang “Queen of Hills” ta ajaba Shimla yimti nung tzü mopung menenja kümdagi.