New Delhi, April 21 (Agencies): Centre-i Uttarakhand state nung Tir yimsüsüba benoka aliba Uttrakhand High Court tetuyuba ajanga agienbaji Narendra Modi’er sorkar atema maksü tulu ta shia tanü Delhi Chief Minister, Arvind Kejriwal-i, shimteta aliba sorkartem Ato kilonseri jangjongba anentsüla aser democracy akhümtsübutsüla, ta ashi.
“Iba ya Modi’er sorkar atema maksü tulu. Shimteta aliba sorkartem jangjongba mapa pai anentsüla aser democracy akhümtsübutsüla,” ta Aam Aadmi Party (AAP) tongti lenir aser Delhi CM, Kejriwal-i twitter ajanga ashi.
State nung Tir yimsüsüba benoka aliba tanü Uttarakhand High Court-i agientsüba sülen Harish Rawat-i aniba Congress sorkari maneni tashi angutsü maongka nguogo.
High Court-i state Chief Minister, Harish Rawat dang April 29 nü state assembly nung par züngsemtem tashi sayutsü tuyuogo.
March 27, 2016 nü linük Temzüng nung Arrla 356 kübok Centre sorkari Tir yimsüsüba benokba agienja Chief Justice, K M Joseph-i aniba High Court division bench kati, Supreme Court-i benokba ozüng nung ajemdaker Tir yimsüsüba benokbaji mapet, ta ashi.
Shimteta aliba sorkar Modi-i mejangjongtsüla: Kejriwal added by asungba on
View all posts by asungba →
You must be logged in to post a comment Login