Shingaia Amma amai nüngtugu mekümtettsü

New Delhi, December 6 (Agencies) : Mongulbarnü India yimtiba, Delhi nung Tamil Nadu Chief Minister J. Jayalalithaa nem yimti nung aliba Tamil nungertemi tatembangbuba akhümtsübu agütsüba mapang parnoki, lai yutsür aoba ongdang tuluji shingaia mesüngdaktsütettsü, ta ashi.
IANS-i jembiba Tamil nunger tetsür aser teburtem, mapa tulu inyaker nungi shir sensaktiba tashii Hombar aonung arishi küm 68 nung asüla, Jayalalithaa ji tatishitsü aketba lenir ka lir ta ashi.
Lai lar state nung tekepok jenjang nung alirtem atema kanga shishia bilemja parnok atema bendanga agüja inyakba ajanga Tamil Nadu nüburtemi la kanga sapua aküm aser state tesem ajaklen kanga nüngtugu aküm.
“Shingaia Amma amai nüngtugu mekümtettsü kechiba süra lai teti nüburtem asoshi langkabosa inyaknüa liasü,” ta Delhi Tamil Sangam nung sensak asemba mapang G.N.D. Elangovan-i ashi.
Film star nungi yimsüsüba menden nung ajemokla, Jayalalitha-a la nem tesayuba agütsür aser AIADMK party ngutetsang MGR/M.G. Ramachandran mesüka kümogo.
“MGR-a la mesüker liasü,” ta Elangovan-i ashi. “Pa 1987 küm asüba sülen pai yutsüba ongdang Jayalalithaa-i mesema liasü. Lai sensakertemi malitetba osettem mixers, grinders, aser fans den electricity dena angadi agüja liasü. Lai senpak 10 agi chiyungtsü tebok sünga angutsüsa Amma Canteen ka lapoktsü. India nunger lenir shinga India nung la amai nüngtugu masü,” ta Elangogan-isa shisem.
Qutub Minar nung mapa tilaka inyaker S. Kandasamy-i, “Laji ozü Amma lir. Lai sensakertem atema kanga bilemtsü. Lai la kibong akümtsü atema mebilem saka Tamil Nadu nung sensakerrtem atema ang bilem,” ta nüktzü yima ashi.
Delhi nung arua alir aser mapa inyaker Tamil nunger aikati Tamil Nadu den teti tesendaktep mepilar. Karibo parnok vote-a state nung oa agütsür. Ajisüaka state nung oa vote magütsürtemia dena la ajungba indang ojang ka mesüra anabosa ashi.
Delhi nung alir, Tamil nunger M.S. Ravi-i, “Punguben tashi Chief Minister inyakla, Jayalalithaa-i sensakertem nem ki agütsü, tzü tajemtsü bottle nung senpak 10 alang adoktsü aser sensaker jalatem kibong akümba mapang hon den sen teyari dena agütsü,” ta ashi.
Lar sorkari sensaker kibongtem nem jang seret metsütsü (20 kg each) angadi lemtsüba den state nung kaketshirtem nem bus nung jajatsü atema bus pass, kaket, laptop aser cycle tem angadi agütsü.
“Onoki Amma onok masü tashi mamatettsü,” ta Ravi-i IANS dang ashi.
“Jayalalithaa ji sensakertem atema messiah mesüka liasü,” ta Delhi Tamil Sangam Secretary, Mukundan-i ashi.
“La lokti jakdang aoer ka aser lar mapang actress tem rongnung sen timtiba aateter actress ka liasü,” ta pai ashi.
Lai inyaktetba mapa ajak rongnung tulutibaji Tamil Nadu nung “goondaism” anendaktsüba lir, ta aikati ashir.
Iba den külemi lai state nung yi shibangtsüba ajanga yijemer kinungtsütemi la kanga nungita liasü. Ano sandalwood shibelener Veerappan tepsettsü atema lai police nem tashi bendanga agütsü.
Mongulbarnü Delhi nung aliba Tamil nunger indang dokantem ajak la nem akhümtsübu agüja shibanger ayu.