Shinzo Abe-i Asia linüktem sema senzütsü

Tokyo, January 11 (Agencies) : Brihostibar nungi tenzüker anogo trok tashi Japan Prime Minister, Shinzo Abe-i Philippines, Australia, Indonesia aser Vietnam linüktem sema senzütsü, ta media osang ka ajanga metetdaktsü.
January 20 nü US President-elect Donald Trump-i menden melenzükba sülen US ketdangsübaren nung temelenshi adoktsü akok ta arentaka bilemba mapang ka Abe-i Asia-Pacific tour sentong agitsü.
Donald Trump-i pa US Tir akümba sülen Asia-Pacific tesem den shishilembaba nung telatetba takang kar agitsü ta metetdakja lir.
“Asia-Pacific tesem nung US alliance network tajungba akümtsü aser iba tesem nung tongtipang linüktem tali amalitep alitsü atema Abe-i linüktem sema senzütsü” ta Bodbarnü tongti ketdangser kati Japan Times dang ashi.
Abe-i linük pezü den ashishitep aketba South China Sea nung China-i sepaitem akangshiba indang onük benoka lemteptsü.
Brihostibarnü pai mezüng Philippines-i aotsü aser Honibarnü Australia Prime Minister, Malcolm Turnbull den ajuruteptsü.
Deobarnü Abe-i Indonesia semdangtsü aser idakji Indonesia President, Joko “Jokowi” Widodo den ajuruteptsü.
Vietnam nung Abe-i Prime Minister Nguyen Xuan Phuc, President Tran Dai Quang aser tanga tongtipang ketdangsertem den ajuruteptsü.