Shirdi nung PM-i PMAY kübok nisung lakh 2 nem ki jabi agutsü

Shirdi (Maharashtra), Mongputeni/October 19, 2018: Tanü Shirdi yimti nung Ato kilonser, Narendra Modi-i Pradhan Mantri Awas Yojana- Gramin (PMAY-G) scheme kübok tambur ka nem ki jabi agutsüba noksa nung angur. 

New Delhi, Mongputeni/October 19 (Agencies): Tanü Ato kilonser, Narendra Modi-i ‘Dussehra’ benjungmong tenüng nung Maharashtra state kübok temeshi yimti, Shirdi semdanga liasü.
Tanü Modi-i Pradhan Mantri Awas Yojana scheme kübok nisung 2,44,444 nem ki jabi agutsüogo.
Shirdi nung lokti senden ka nung jembidang Ato kilonser, Modi-i, “Talidak ki aliba ajanga libaliro tezülaba akumer aser sensak tia anema raratsü atema ajungmesor. Ibaji temelungjang nung yur sorkari 2022 küm tashi nungbo nisung ajak talidak ki alitsü nükjidong yur inyaker. Onoki iba nükjidong tesadang kabo tongogo, aser iba atemaji pelaa bilemer,” ta ashi.
Modi-i, Pradhan Mantri Aawas Yojana (PMAY) scheme ya sorkari sensak tia samatsütsü atema benokogo, ta shia iba scheme ajanga tajangzük angurtemi shisaliok ajanga tarutsü putu lanurtem nem tashi agutsütsüla, ta ajungshi.
Paisa, iba scheme kübok pucca ki angurtemi Ayushman Bharat healthcare scheme tajangzük-a agitsüla, ta ashi.
Taoba mapang Congress aser UPA sorkar aija Modi-i, taoba sorkari ki lakh 25 dang agutsü, ajisüaka BJP-i aniba NDA sorkari tesüiba küm pezü nung ki crore ka ser lakh 25 yanglutsüogo, ta ashi.
Congress aser Gandhi kibong aija pai, opposition-i votebanks atema dang bilema inyaker aser kibong ka dang ajungkettsür, ta ashi.
Kasa sentong nung Maharashtra Chief Minister, Devendra Fadnavis-a dena liasü.
Shirdi Saibaba’s Samadhi küm 100 ajungba benjungmong tembangba sentong nung adentsü atema Ato kilonseri tanü Shirdi semdang.
Iba benjungmong tembanga India aser bendanglen nungi nisung million 10 aden.
Samadhi küm 100 ajungba nüngtem nung Trust-i küm ka piyong benjungmong ayongzüka liasü aser iba benjungji yaküm Mongputeni/October 1 nü linük Tir, Ram Nath Kovind-i tenzükja liasü.
Yaküm Luchii/December ita nung linük tatong Tir, M Venkaiah Naidu-i Global Sai Temple Conference tenzükja liasü aser iba mapang nungjagi tenzüka küm ka piyong sentong balala agia aruogo.