Shiri sorkar akümtsü?

Kanga dang yongya aliba election anogo süitemogo aser Nagaland kübok constituency balala nung tarutsü sorkar ketdang asütsüpurtem shimtsü atema asenoki vote agütsüogo. Joko Metsüremi 3, 2018 anogo nungang asenoki osang tejangja metettsü aser iba anogo nung jiang shiri sorkar akümtsü’ar jangjatsü. Ajisüaka, tanü Nagaland nung yimtenren tensa asenoki reprangdangra teloktep sorkar ka-sa arutsü ama asadangteter. Assembly menden 60 nung amentsü atema candidate ajak agi parnok 196-i toktepogo aser parnok rongnung Naga People’s Front (NPF) nungi 58, Congress nungi 18, Bharatiya Janata Party (BJP) nungi 20, Nationalist Democratic Progressive Party (NDPP) nungi 40, National People’s Party (NPP) nungi 25, Janata Dal (United) nungi 13, Nationalist Congress Party (NCP) nungi 6, Aam Aadmi Party (AAP) nungi 3, Lok Janshakti Party (LJP) nungi 2 aser Independent 11 lir. Election matongdang NDPP aser BJP telok na tsüngda mezüng tesentaktep yanglu aser parnok sülen NPF aser NPP teloktem tsüngda tesentaktep yanglua liasü. Nagaland nung opposition maliba sorkar dena kümteter inyaksangshia aruogo, anungji nübortemi pei pusemba party mesüra candidate tem nem vote agüjaka, kechi ang ataloktsüar meshitet. Shibai metet Metsüremi 3 nü election osangji temai adokba sülen ano party ajak lokteper akümba sorkar ka arutsü akok mesüra Centre nung oagi National Democratic Alliance (NDA) nung adenba teloktem ajak yaritepa sorkar ka akümtsü ana nung lir. 13 buba Nagaland Legislative Assembly indang election nung Independent candidate tem dak alaka tanüngba party temji reprangdangra NDA teloktep nung dena aliba teloktem teimba lir.
Party balalai election nüboyimba maparen inyaka arudang NDPP-BJP külen aser NPF külen ta ser tesashiba toktepa jembitepogo saka parnok ajakji Centre nung sorkar kümteta aliba NDA nung külem yaritepertem dang lir. Aji agi, Nagaland nung taruba sorkarji tang amai NDA nung dena alirtemisa akümtsü aser menden peria mongutetra parnok külemi lokteptsü ana nung lir. Centre nung NDA teloktep kübok Congress, NCP aser AAP dak alaka BJP-i anir NPF, NPP, JD(U) aser LJP teloktem dena lir. NDPP ya telok tasen ka lir saka parnoki BJP den tesentaktep yangluogo anungji parnoka NDA teloktep nung taden den kasa lir. Anungji, taruba Nagaland state sorkarji komala teloktepi kümdir kümaka, opposition tesashi aliba sorkar ka ang kümdaktsünür.