Shiruru mekangshitsüla

Alima nung aliba shirurutem ya Tsüngremi nisungtem nüngdak asoshi yanglutsübatem lir ta angatetter, kechiyong nisung shinga shiruru teyari tilakata magiibo melitetter. Nisungtemi shirurutem dak nungi teyari agibatemji kari shi achir, kari mamatsü ajemer, kari shiruru tezüng agi yanglua süoshi ayoker, karibo shiruru teküp aser teret agi oset tapu balala yanglur. Ano, shirurutemi nisungtem alu alaba aser khu abenba nung yarir. Itemji dang masü saka shirurutem kar dakbo nisungtem mener senzür aser ano shirurutema asayaba tapu kar nungbo shilem agidaktsür. Aji oda, alima nung nisung kari shi machir aser karibo achir aser shi achirtem rongnunga kari achiba shi karibo machir ta pei sobaliba aser tamangba yimsü agi aji bendanger. Iba amaji nisungtem rongnung sobaliba balala asüba agi aiben shi achiba tsütsü mangatettep adoker. Atangji, chiyongtsü tsütsü nisungtem rongnung obang mapu adokba ya tanü tasen masü. Akhidang, tenyartem mapanga nunga Korint nung alirtem rongnung kechi shi achitsüla aser kechi shibo machitsüla ta asüba nung kanga mangatettep adok, anungji Tenyar Pauli parnok dang kechisa Tsüngrem nem tenüngsang agütsür chitetter itemji merati chiang, kechiyong alima nung aliba oset ajak ya Kibuba meyong ta 1 Korint 10 nung shia aliba asenoki angutsü. Tetezü, ak shi, nashi shi, azü shi ta kecha mali, kechisa Tsüngremi asenok asoshi achitsü moatsü ta asenoki angatetter, itemji Tsüngrem sanga achitsüla.Itemji kodang asenoki bilemdangdir, tanü India lima nung chiyongtsü atema nisungtem rongnung meputep adokba aser ozüngsa ozüng yangluba tensa tia ya akhidang Korint nungertem dang nungibo kanga agia tebenjaba aser timtem tuluba ajuruba asenokia ajangshir. Yihuda nunger ama Tejen Laishiba nung shia aliba kisüng benshidi süra asenokbo ak shi masü nashi shiang achitsüla saka India nungbo nashi ya tsüngrem amato külemer teimba, anungji state aika nung ozüng agi nashi melepdaktsür. Item ozüngji anema nisung kari nashi shibelenba agi telok jadener züka züka zükseta südaktsüba osang aika asenokia angashiogo. Iba amaji, ano aikati ak shi machir. Ano, India nungbo shi machirtem aika lir, anungji parnok tsüngdang shi achibaji tesempatsüka. Tang ano asen lima tashi aruagi kanga sashia jembibaji, tangalen nungi azü mashimashi bener arua shishilembadak posta nung kangshia seper tayokdak ayuba, shishilembadak azü shi ayokba, azü shi achiba, azü kimalen chiokra yimteni khasettsü ozüng agütsüba aser khasetba onüktem lir. Itemji India lima ajunga nung kanga sashia jembiba agi, India len nung jagi yimten aser lokti tentettemi rongshi maremtet, Nagaland government-ia Nagaland-i azü bener marutsü aser Nagaland nung azü metepsettsü indang ozüng azüng südi. Atangji, azü dang masü saka shiruru merenshiba, reshikangshiba aser kangshia südaktsüba ajakji asen sobalibaia memelar. Aji oda, asen tsüraburtemia asen taküm aser kibong nung mazükmaru denala ta kidang azü, ak aser nashijibo yutsür, an rangset dang dena timtema asütsüsa mekangshitsüla ta sayubentsü o tajung shia aru. Tetezü, India nung 1960 küm Prevention of Cruelty to Animals Act (PCAA) melatet dang yongi, asenokbo shiruru dak mejungi mebenshitsü (cruel masütsü) aser mekangshitsübaji asen sobaliba nung teinyaktsü (moral obligation) tuluka liasü. Kodang asenoki itemji jungjunga bilemdangdir, ak dak taochi makai azükba, an tetsüng aser tashikang alener langkoshishi abenba, nashi tepset dang kangshia südaktsüba ajakji asen sobaliba aser India nunger PCAA ozüng anema asütsü. Aji oda, nashi, kor aser shiti nem khu tali bendaktsüba aser shirurutem alena ayuba aser chiyongtsü shitak magütsüba ajakji PCAA ozüng anema lir. Atangji, shirurutem ajak rongnung nisung dang meimba shiruruji azü ya lir, iba jagi azü yabo nisung tembar ta jembir. Aji oda, asen sobaliba nunga asür den külemi odaktsütsü atema azü-ang tenla agüja tepsetba otsü lir. Ajisüaka, ano Naga nunger kin aika asoshi azü shi ya temang atema chiyongtsü tajung ka ama achir. Iba tangatetba nung, Nagaland nung azü metepsettsü ta masü saka azü kangshia mamshitsü ta latetba tajungba süla.Nagaland ama nungbo, azü ya nashi ak metsüba ama, farm küma metsütsü asoshiang lanurtem ajungshitsüla.