Shiruru nungi meimchir dak menaba tashidaktem atema tebilemtsü abener

Kohima, Chiteni (July) 6 (TYO): Tanü World Zoonosis Day amungdang Nagaland nung Department of Animal Husbandry & Veterinary Services (AHVH) aser Department of Health & Family Welfare tsüngda amalitep lia maparen inyaktsü nüngdak ta asüba onük lemsatep.
Meimchir tsüngda menatepba tashidak 10 nungi 6 bo shiruru ajanga menashir ta osang bushiteta lir. Iba tebilemtsü atema Nagaland nung sorkar department anan tang mezüng atema longjemer Zoonosis Day amung.
Zoonosis tetezü ya shiruru nungi meimchir dak menaba tashidak dang ajar.
Kohima nung ayonga amungba sentong nung AHVS Director, Dr Aomangyang Walling-i ashiba agi, “Zoonosis Day ya nübortem dang zoonotic tashidaktem metetdaktsütsü aser item tashidak anema mapa inyaktsü tesayuba agütsütsü atema amunger.”
Zoonotic tashidak 150 shi ka puteta lir saka iba atema asenoki shisabulua mebilemtsüla saka asenoki tashidak menaba aser noktangba meteta alitsüla, ta paisa metetdaktsü.
Shiruru dang nungi meimchiri menazükba tashidaktem indang osang prokshitsü atema iba anogo amunger. Tashidaktem rongnung Rabies ya ka lir kechiyong iba tashidak yagi nisung taküm agir. Rabies ya noktangteter saka kümshia alima nung nisung 59,000 shi ka rabies agi shirangba azütemi angohba ajanga asür ta World Health Organization
Shiruru aser meimchir indang doctor tem tsüngda tesentaktep lia mapa inyaktsübaji kanga tongtipang kechiyong tashidak 200 jungnüa zoonosis kübok lir aser item tashidak ajanga meimchirtem ang teimba kangshir. Ajisüaka, kaketshirtemi tashidaktem indang tali meteta alitsü atema medical curriculum meyanglushir, ta Dr Aomangyang-isa ashi.
Tesüiba küm 10 tsüngda tashidak tasen noklang nung shilem 75 shi ka pathogens ajanga adokdaktsüba putetogo aser ibaji shiruru mesüra shiruru nungi adokba lir ta bushitetogo ta WHO-i ashiba osang paisa lemsatep.
Tashidak tulu maküm tashibo nisungtemi parnok zoonotic tashidak agi shiranger ta memeteter. Iba ajanga rongsenkettsüng aser meimchir o shiruru taküm atema tetsükdaktsü bentsür arur. Anungji department ana külemi longjemer zoonotic tashidaktem indang osang prokshitsüla ta Dr Aomangyang-i metetdaktsü.
Sentong nung Director (Family Welfare) in H&FW, Dr Tokoho Chishi-ia o jembidang, “tesüiba küm 10 shi tsüngda zoonotic tashidaktem ya public health tebilemtsü tulu ka kümogo anungji physicians o veterinarians tsüngda amalitep lia mapa inyaktsübaji kanga nüngdak kümogo.”
Zoonotic tashidaktem menatepba azüoktsü atema kiset shiruru aser tanga shirurutem mapang shia vaccination asütsü nüngdak, ta paisa ashi.
Sentong nung Joint Director AHVS, Dr Simon Ao aser State Surveillance Officer, IDSP, HFW, Dr John Kemp nati power point presentations sayu.
Sentong nung mendenji Deputy Director AHVS Dr Kuokehebi Gwirie liasü, State Nodal Officer IDSP HFW, Dr Nyanthung Kikon-i tesentepertem pela agizük aser Deputy Director AHVS Dr Amenla Walling-i anküp tepela o jembi.