Shisabolurtem tapu ana

Taküm nung shisaboluba ya majung saka shisamebuluiang nisung taküm ka tajung mekümtettsü. Nisung kati ni kechi akümtsü ta shisabolua mebilemra züba-zübaa dang alitsü aser memetetika takidak maka kümadoktsü. Atangji, nisung karbo peria akaba agi aser senotsü angulen junga aliba agi shisabolua mebilemi alitsüa akok. Ajisüaka, pei asoshi peria akayonga senso tajung aikati pei lima aser nübortem asoshi shisabolua bilemer. Aji oda, Nagaland nung shisabolua bilemer tapu ana lir. Shisabolua bilemer telok kaji election-i aitsüpurtem asütsü aser tanga telok kaji lanurtem asütsü. Election-i aitsü purtem shisabolua bilembaji kodaser election nung adoktsü ta shisabolur. Iba shisaboluji tuluka, ajisüaka iba jagibo nübortem majangzüker. Ajisüaka, lanurtemi shisabolua bilembajibo tanü amai maparen ajak nung ochimashi mapatem ya menokdangteti maneni odaktsüra parnok asoshi tarutsü anogotem kanga majungtsü ta bilema shisabolur. Aji oda, election-i aitsüpurtemi sen kara adoktsü ta shisabolua bilemer asünungji shitaklen – mashilen kecha mali, sen dang ngura ojang ta bilema sen bushir. Iba jagi tanü asen lima nung terenlok inyakba mangur aser asenok tejakleni onüaka moutetter. Iba timtemji ngua lanurtemi shisabolua bilemba agi tanübo tesem ajak nung lanurtemi meshitak inyakba aser ochimashi mapatem anema kanga sashia nokdakba angur. Akhidangbo, Nagaland nung kaketshir telongjem teloktem dak alaka lanurtem telok kangabo mali asü saka talisa taoba küm asem pezüka jakdang nungi tesem tesem nung lanurtem telongjem tentetba angur aser item jagi ochimashi mapatem anema kanga sashia nokdakba angur. Nagaland nung ibai nübortemi temelenshi ka aginüa apusoba mapa ka asütsü. Ibaji lanurtemi taintemi junga yimsü mesütetba aser lokti junga  manitetba ngua mulung animesüngzükteti shisabolua inyakba mapa ka asütsü. Item lanurtem tentet rongnung asen lima nunga Mokokchung Town Lanur Telongjem aser  Mangkolemba Ao Lanur Telongjem na asütsü. Aji oda, iba lanurtem telongjem telok ana yagi asen lima junga kümdaktsünüa shisabolua inyakba mapatem mapang shia angur. Item  lanurtem jagi yimten aser lokti inyakyim nung meshitaki inyakba ngua kanga shisabolua bilemer. Iba jagi parnok tajangzük asoshi masü nübortem ajak ajangzüktsü mechi nung parnoki anibelem aser nüngsen agia inyaker. Tanüa asen lima nung yimten inyakyim reprangra yimtena mali amato kümdagi. Joko, office nunga kecha system ka mali küma odagi. Mapa inyaktsü atema tender notice magütsür aser mapa inyaker shimtsü asoshia advertisement magütsür aser tatidang magi dang shimer. Aji oda, deparment nung mapa (post) ali mali kecha mali aser ita sen agütsütsü sen ali-mali kecha mali, ozü nisung aser ozü kinunger ka government mapai idaktsütetter asü meidaktsütetter ta bilemba agi government mapa nung inyaker tasen meshimtsübo ozüng yanglua ayu saka küm shia government mapa inyakerbo teimba teimba akümer. Joko, sorkar gari lenmang aser kiojen ajak kibur mali küma odagi. Aji oda, lanur putu asoshibo senmang kecha makatsüsa mapa inyakyim ajak raksaogo. Ibaji akhidang Yisusalem jara laoba tia den kasa dang lir. Iba jara laobaji mesotsü aser yanglushitsüba mapaji lanurtem mapa lir, ibayongji lanurtemi kanga shisabolua bilemer. Atangji, state nung Nagaland Voluntary Consumers’  Association aser ACAUT telok ama ya lanurtemi pei lima teraksa tia nungi anitettsü tentetba elongjem tentettem lir. Parnokisa akok tashi tasü majem Naga lima yangluba mapa nung shilem agidagi. Naga nunger yimsüsür aser taintem kar electioni aitsü shisabolur aser kar kiojen aika alidena ayutsü shisabolur ta asüba tensa tia ka nung Naga nunger lanurtemi Nagaland yanglushitsü shisabolua bilema inyakba aser jembiba jagi, shitakba, Nagaland melenshitsü imlar. Asenok tang amai anepdang nungi aonung tashi ochimashi mapa inyaka dangbo malitsü, kenübosa lanurtemi ochi agi Naga lima yangertsü.