Shisaliok Anogo

1966 küm 14buba UNESCO senden alidang September 08 anogo ya International Literacy Day anogomong asutsü, ta UNESCO-i sangdonga liasü, aser 1967 mezüng linük aika nung iba anogo among aser iba küm  nungjagi tenzüka küm shia shisaliok anogo ya  mongyonga arudar. Iba anogomong amongba ya shisaliok koda tongtibang, ibaji meimchir ajak aser lokti ajak nem angatetdaktsütsü nükjidong nung amonger. Tang alima nung tain million 775 dakbo minimum literacy skills mali; tain pongu rongnung katibo azüng-zülu mashi aser parnok shilem asem rongnung anabo tetsürtem lir. Iba dak alia alima nung tanur million 60.7 bo school mazünger mesüra karbo school züngtur toktsüogo. UNESCO indang Global Monitoring Report on Education for All (2006) ajanga ashiba agi, adult literacy rate tajemtibaji South Asia lir (shilem 58.6%.). Taintem rongnung dang masü saka lanurtem rongnunga literacy rate kanga ajema alibayong South Asia linüktem aika tang tashi junga merenlokba aser sensak tia nung aliba kuli sayur. Kümshia International Literacy Day ya omen balala nung ajemdaker amonger, aser taküm küm atema omenji ‘Literacy and skills development’ lir. Terenlok aliba lokti ka nung meimchir den tongtepratepa inyaktsüji kanga tongtibang, aser iba atemaji shisaliok den basic skills nüngdaker. Iba tangatetba nungji taküm 52buba International Literacy Day atema omenji ‘Literacy and skills development’ shimogo. ILD 2018 omen nung aliba ‘Skills’ teratetji- shisatsü, teka mapa balala ashiba aser mapa ngua taküm alitsü atema technical, vocational aser digital angazüka meteta aliba lir, ta UNESCO-i metetdaktsü. Yamaji shisaliok tsütsü India jenjanga reprangdangra Annual Status of Education Report (ASER)- Rural 2017 ajanga ashiba agi, tang India yimtsüngtem nung lanur shilem 36-ibo linük yimtibaji New Delhi lir ta memetet. ASER-i India yimtsüngtem nung arishi küm 14-18 tsüngdapur lanur 28,323 dang asüngdangyaba ajanga bushitetba agi, parnok aikati ongko tezüpaa memetet aser aikati India map nung pei state-a mesayuteter. Ibaji ketdangsertem atema tayongzükba wadang tulu ka asütsü. Tang India nung sorkari tanur arishi küm 6 nungi 14 tashi nem angati shisaliok agütsür aser ibaji tanurtem atema temeden ka kümogo, ajisüaka iba jagi meperi ta angateta ASER-i sorkari dang angati shisaliok agutsütsü atema tatakzükji arishi küm 18 tashi kümtsüba den külemi teka mapa balala sayutsü atema benokogo; ibaji sorkari agizükra yimtsüngtem nung lanur jenti ajangzüktsü. Tanü iba anogomong amongdang asen state sasep nunga sorkar dak dang ajak meimlai Arogo, lokti tentet aser melungtet telok balalai item lanurtem nem teka mapa balala indang skill training agütsütsü maongka lir. Külen sorkari Right to Education (RTE) Act yanglushia arishi küm 14-18 lanurtem nem angati shisaliok agütsüdang Arogo, lokti tentet aser melungtet telok balalai teka mapa balala training agütsü nungbo tarutsü nung item tanurtemji tajung küma lokti nem khuret bener arutsürtem masü saka lokti nem tajangzük agutsürtem akumtsü.