Shisaliok atema inyakba department-temsa meshitakba: ACAUT

Dimapur, Oct. 12 (TYO): Nagaland nung shisaliok agütsütsü asoshi inyakba department-temsa ochi-tashiba aser tajungba asütsüla ser nung item department-temi inyakba mapatemsa meshitakba aser tamajungba, ta ACAUT teloki metetdaktsüogo.
Shitakba reprangdangdi süra, Nagaland sorkar kübok aliba department-tem rongnung meshitak, ochimashi aser tim mesüi inyakba mapatemji School Education, SCERT, Technical Education aser Higher Education department-tem nungsa tamajungba aser teimba inyaka lir, ta parnokisa metetdaktsü.
Iba ama tesayur shimba maparen nung tim masüba lenmang nungi tesayurtem shimtetba ajanga state nung kaketrejutem nung sayuba shisaliok jenjang kanga mejungi kümdagi, ta ACAUT telokisa ashi.
RTI ajanga meshiba kakettem nungi metetba agi, 2005 nungi 2015 küm tashi nung Lecturers aser Assistant Professors 39 tashi NPSC majangi dang department-i dang regularize sütsü. Ano, aji dang masü saka nisung tenet tashi National Eligibility Test (NET) dena majangtet contract nung dang Assistant Professor inyaka lia regularize sütsüba putetogo. College nung sayutsü asoshibo nisung ajak NET bosa ajangtsüla ta ozüng lateta lir.
Ano, kasa mapa nung shimertem rongnung nisung kabo M.Ed degree mali asü. Iba degree malirbo tesayur inyaktsü metemsü ta ozüng nung shia lir.
Tang tashi nung taoba küm tenet tsüngda 2007 nungi 2013 küm tashi nung tesayurtem meshitaki shimertem ajak agi 39 liasü. Item rongnungji 2007 küm NPSC majangi tezülen nungi lecturer 22 shim, 2011 küm Assistant Proffessor 6 tezülen nungi shim, 2012 küm tezülen nungi Assistant Professor ka aser Hub engineer ka aser 2013 küm tezülen nungi Assistant Professor 9 shim. Item rongnung ano nisung tenetbo NET majangteti liasü aser ano kabo M.Ed majangteti liasü.
2010 küm sorkari sangdongba osang ka nung, NET majangtetra tesayur inyaktsü metemsü asütsü ta jangjajangjaa shia lir. Aji oda, taoba küm 15 tsüngda NPSC ajanga timi tatidang agir shimertem 82 liasü, anungji iba mapang meshitaki shimer tesayurtemji 32% liasü.
Iba ama tim mesüi shimba mapa anema inyakba ajanga lokti aser kija nem tajangzük agütsütettsüsa Public Interest Litigation (PIL) agütsütsü renemdagi, ta ACAUT telokisa metetdaktsü.