Shisaliok bushiba ya degree atema dang masütsüla

Dimapur, Mongputeni (October) 19 (TYO): Shisaliok bushiba ya degree ka angutsü atema dang masütsüla saka tejakleni aotsü atema hadir ka ama kümdaktsütsüla, ta tanü Nagaland Governor P.B. Acharya-i ashi.
Mezüngbuba Mizo novelist L. Biakliana asoba anogo tenüng nung international seminar ka ayonga agiba sentong nung Governor Acharya-i iba tayongzükba agütsü.
Mizoram nung aliba Government Saitual College nung iba sentong ayonga agi aser iba mapang Acharya-i Mizo nunger temelenshi bener arur Biakliana-i mapa tajung inyakbatem prokshitsü ayongzük.
“L. Biakliana ama lokti nung temelenshi bener arur aser shisashirtem indang taküm aser mapatem osang belenshitsüla. Tanü putupur ajungmesotsü aser linük tajungba kümdaktsütsü merangtsü atema asenoki iba mapa inyaktsüla” ta pai ashi.
Iba shisatokden sentong nung Acharya-i ‘The Seminar Handbook’, ‘Zir-Ang-Aw’, ‘Let-Us-Learn’, ‘Hum-Sikhe’ aser ‘Zacham Par-Chhuang’ kaket pungu sayatsü.
Mizoram Principal Secretary, Lalnunmawia Chuaungo-i Biakliana ajanga mapa tajung inyakba aser Mizo loktiliba nung tetsürtem jenjang ajungketba nung yaritepba indang osang metetdaktsü.
Pai lanurtem dang tejangraba aser mulungsoba tangatetba alitsü aser tejakleni aotsü atema meranga inyaktsü ayongzük.
Anogo ananü international seminar ya Department of Mizo, Mizoram University, Mizo Academy of Letters, Government Saitual College aser Saitual Literature Club teloktemi ayongzük.
Sentong nung Mizoram University, ICFAI University, Champhai College, Saitual College nungi shisashirtem aser United Kingdom o Myanmar nungi tongti nisungtem aden.