Shisaliok nung Hindu tesayuba enokbaji India atema tajung: Katheria

Lucknow, June 19 (Agencies): “Shisaliok aser linük nung Hindu tesayubatem enoksema prokshitsü aser iba inyakyim ya linük atema tajangzük asütsü,” ta Agra nungi MP & Minister of State for Human Resource Development, Ram Shankar Katheria-i ashi.
Honibarnü Lucknow University nung Hindavi Swaraj Diwas Samaroh benjung amungdang Katheria-i iba onük jembi. Hindavi Swaraj Diwas Samaroh ya Maratha nunger chuba Shivaji chuba menden nung amenba bilemtetbamung lir aser taküm küm 342 ajungba sentong ayongzüka amung.
Taküm benjung nung mendenji Uttar Pradesh Angh, Ram Naik liasü aser iba mapang Minister of State for Human Resource Development-i ‘saffronisation’ indang onük jembi.
“Osangzülur kari shisaliok nung Hindu nunger tesayuba enoksemer asü ta onok dang asüngdanger aser ibaji shitak ta ni langzür. Shisaliok aser linük nung Hindu tesayubatem enoksemtsü aser prokshitsü” ta Katheria-i metetdaktsü.
“Saffronisation mesüra sanghwaad (RSS tesayuba prokshiba) süang, linük atema kechi tajunga südir ibaji ataloktsü” ta paisa shisem.
“Shisaliok indang curriculum nung linük indang konang aser akhüm ajungkettsü atema enoksemtsüla. Mapang talangka onoki ola madok liogo aser shinga nema tai metongloktsü, saka tanü linük nung iba tensa ajuruogo” ta paisa ashi.
“Asenoki Maharana Pratap aser Shivaji Maharaj indang putiotsü mebushira, kodaser Genghis Khan indang putiotsü bushitsü?” ta paisa asüngdang.
Pai jembiba onük ya social media nung nisungtemi aser yimten telok aikati aitsüogo aser Congress Rajya Sabha MP & National Commission for Scheduled Castes Chairman, P.L. Punia-i iba onükji “kukua aitsütsüla aser linük anema lir” ta metetdaktsüogo.
“Saffronisation nung India nunger ajak madener. Nenoki shinüra ‘Indianisation’ ta ashitsü akok. Mapatong aser tebilemba ajakji India nung shilem ka dang masü saka ajunga dak rangloker inyaktsüla. India sorkari loktiliba nung shilem ka atema dang masü saka ajak dak rangloker inyaktsüla” ta Punia-i osangbener dang ashi.
Taküm küm tetenzüklena Minister of State for Human Resource Development, Ram Shankar Katheria-i Agram nung VHP züngsem ka tepsetba sülen asüpila sentong ka nung Muslim nunger anema o jembi aser ibaji ajanga Parliament nung ashishitep ken o adoka liasü.