Shisaliok nung temelenshi atema meranga inyakogo: Irani

New Delhi, July 06, 2016 : Bodhbarnü taoba Human Resource Development (HRD) minister, Smriti Irani-i Union Textiles Ministry mapa agizükba sülen osangbenertem den jembiba noksa nung angur. Mongolbarnü Union Cabinet menden melentepdang la HRD ministry agi Textile portfolio melentsüba ya jenjang tajemba ka agütsü amai aikati züngshir.

New Delhi, July 06 (Agencies): Mongolbarnü Modi’er sorkar ministry tem menden melentepdang Human Resource Development (HRD) minister, Smriti Irani nem Ministry to Textiles lemzüktsüba sülen tanü lai, tesüiba küm ana nung lai shisaliok nung temelenshi atema meranga inyakogo, aser Modi-i la nem linük tenzüktsü maongka agütsüba atema pelar, ta ashi.

“Tesüiba küm ana nung HRD Ministry-i inyakba ajakji kaketshirtem nem shisaliok tajung agütsütsü atema inyak,” ta lai twitter ajanga ashi.

Yashi Union Cabinet ulushiba mapang Irani indang Human Resources Development Ministry Prakash Javadekar nem agütsü aser la nem Textiles Ministry lemzüktsü.

Minister of State for Textiles, Santosh Gangwar nem-a MoS (Finance) lemzüktsü.

“Narendra Modi’er mangdang- ajak nem shisaliok tajung agütsütsü atema inyakba nung nungitba atema ni HRD Ministry ketdangser ajak dang pelar,” ta laisa ashi.

Laisa Textile Ministry-i inyaktetba mapa tajungtem atema Gangwar nem tenüngsang agütsü.

Taoba ita Textile aser Apparel sector atema sorkari sen crore 6,000 lemzüktsüogo.

“Santosh Gangwar-i textile ministry nung inyakba mapa tajungtem atema tenüngsang agütsür, aser ni ministry tasenba mapa tenzükdang pai yaritsü nangzükba atema pa dang pelar,” ta laisa ashi.