Shisalioki shisatsü agüja tasü itdaktsür

Kohima, Sept. 13 (TYO) : Shisalioki nisung ka shitakba lenmangi aotsü teyur aser shisatsü agüja tasü itdaktsür ta Nagaland Higher Education department nung OSD Chubasanglai metetdaktsü.
Lai iba o ya Chang Students’ Union Kohima pur yashi Honibar nü Ura Academy Hall nung lokti senden aliba sentong ka nung jembidang metetdaktsü. Lai kaketshirtem ayongzüka jembidang, Kohima tashi aruagi azüngba nükjidongji tangar tejakleni aoba kin den kasasa toktepa azüngtsü aser oagi pei lima nung azüngertem dang nungi tajungba züngtettsü temulungtetba alitsüla ta metetdaktsü.
” Kaketreju kaji naro tsüki ka mesüka lir, kong shiruru tila aika adenshir aser item rongnung kaketshirtem karbo ninang ama mojitsü yanglutsü asoshi naro dak tanang aliba mesepzüka bener aor, ano karbo shinü ama pei topur ajung sayua yimzüa kazür aor aser karbo sorak ama tangar asoshi sang yanglua amongtsü asoshi arur, item shiruru asem rongnungji naa koba asütsü,” ta Chubalaisa kaketshirtem nem tayongzükba agütsü.
Laisa kaketshirtem dang tangar dak nendaka melii peisasa litetba taküm asütsüsa mapa inyak angazüktsü asoshi ajungshi. Tazüngertemji sorkar mapa inyaktsü kija asoshi azünger masü saka peisasa inyaktetba mapa tapu balala angazüka inyaktsüla, ibai tangar dak nendaker aliba putu masü ta laisa ashi.
Laisa kaketshirtem dang ‘backward’ ta asüba tia nung melii joko tangar den kasasa toktepa tajung akümtsü merangtsüba mapang tongogo ta metetdaktsü.
Iba sentong nung Forest & Environment kilonser Dr. Nicky Kire tongti tesemdanger liasü.