Shisaluyimba inyakyim tasenba atema NE minister senden amentsü

Agartala, September 15 (Agencies): Hokolbar nü northeast nung aliba state tiprongla nungi Education minister ajak Agartala nung senden ka mena linük nung shisaluyimba inyakyim tasenba benoka aliba indang jembitsü, ta Mongolbar nü sorkar tongti ketdangser kati ashi.

Agartala nung osangbenertem den jembidang Tripura Education Department Secretary, Samarjit Bhowmik-i, “September 18 nü northeast state ajak nungi Education minister senden Union Human Resource Development Minister Smriti Irani lenisüba nung amentsü,” ta ashi.

Paisa, “Iba senden nung tang benoka aliba national education policy indang lemteptsü. Tang benoka aliba shisaluyimba inyakyim tasenba nung northeast State ajaki pei tebilemba lemsateptsü,” ta ashi.

Ketdangserisa, Hokolbar nü senden ya August 19 nü New Delhi nung 63 buba Central Advisory Board of Education (CABE) senden amenba sülen ayongzüka akar asütsü, ta ashi.

Tripura Education Minister Tapan Chakraborty-i ashiba agi, CABE senden nung northeast nung aliba state aikati elementary school level (Class VIII tashi) nung ‘no-detention policy’ (kaketshir shinga ‘fail’ mesüdaktsüba) agiennüa liasü.

Osangbenertem den jembidang Chakraborty-i, “North-east State tem densema linük nung state aikati ‘no-detention policy’ maginüba dang masü Right to Education Act (RTE), 2009 ajanga iba ya teinyaktsüka kümdaktsüyonga training junga agia aliba tesayurtem agi anüngba ajanga kodamasüba jenjang ka nung lir,” ta ashi.

Paisa, CABE senden nung State temi ‘no-detention policy’ indang tezüluba nung Centre sorkar nem agütsütsü lemteta liasü, ta ashi.

“Ajisüaka onok (Tripura) aser tanga state aikati maneni CCE (Continuous and Comprehensive Evaluation) dang aginür. CCE inyakyim ya Class X tashi nung benoktsüla,” ta paisa shisem.