Shisaluyimba rejutemi kaketshirtem tarutsü yanglutsütsüla

Dimapur, May 20 (TYO): Nagaland nung lanurtemi shisaluyimba angazüktsü kanga jangrar anungji University temi kaketshirtem indang tarutsü yanglutsütsü atema tongti shilem agitsüla ta tanü Nagaland Angh PB Acharya-i ashi.
Nagaland nung aliba University balala nungi Vice Chancellor tem, college balala nungi Principal tem, School Education aser Higher Education Department nungi ketdangsertem aser Nitte University, Mangaluru nungi Vice Chancellor nunger den senden ka amendang PB Acharya-i iba tayongzükba agütsü.
Shisaluyimba nükjidongji loktiliba akangshitsü atema lir anungji shisaluyimba rejutemi Nagaland nung maparen tajungba kümdaktsütsü aser tangar den tokteptettsüsa kaketshirtem tashi itdaktsütsüla. Asenoki sayutetba kaketshirtemji loktliba nung nüngdakbapurtem ka ka südaktsütsüla, ta paisa ashi.
Nitte Medical University, Alva’s Education Foundation aser Moodlakatte Institute of Technology-i Indian National Fellowship Centre den yaritepa parnok rejutem nung concessional seats 129 agütsütsü shiogo, ta Acharya-isa metetdaktsü.
Reju balalai lemzüktsüba mendentemji Northeast aser talisa Nagaland nungi kaketshirtem asoshi lir aser parnoki Nursing, Engineering, MBA, Pharmacy, Journalism, Graduate degree courses, Masters degree courses aser Physiotherapy atema agütsütsü, ta paisa shisem.
Nagaland nung aliba University aser college temi linük nung tanga shisaluyimba rejutem den tesentaktep ayutsüla aser kaketshirtem ajangzüktsü atema maparen balala inyaktsüla, ta Nagaland Angh-isa ayongzük.
Iba senden nung VC Nitte University, Prof Dr SK Bhandary-i power point presentation ka ajanga University indang osang lemsatep.
Senden nungsa Principal Secretary, School Education, Menukhol John aser Commissioner & Secretary to Governor, Dinesh Kumar, IAS na aden.