Shisashirtem anema inyakbaji magizüktettsü: Taoba PM, Manmohan

New Delhi, November 06 (Agencies): Linük nung tamangba lokti tsüngda mepetmesü aser akhümtsübutep maliba tensa tamajungba akümba anema kaket ken o zülurtem, sangro zülurtem, film yanglurtem aser artist balalai lungkak aita award meyipa agütsüba mapang ka nung Hokolbar nü taoba mapang Ato kilonser Manmohan Singh-a lungkak aitba nung densema iba onük nung jembiogo.
Singh-i, tawa linük nung sadoka jembitsü temeten nokdangba aser temzüng alema inyakba mapatem ya magizüktettsü, ta ashi.
“Lokti telemsa mesüra kin telemsa nung ajemdaker pei tebilemba sadoka jembitsü nokdangbaji kecha jenjang nunga magizüktettsü,” ta Manmohan Singh-i ashi.
Hokolbar nü National conference nung “No peace without freedom, no freedom without peace” onük nung jembidang Singh-i, shisashir mongintem amakba ajanga pa kanga jashir ta ashi.
“Tawa linük yangerba maparen anema inyakbatem aikati aitsüogo. Shisashirtem anema inyakba mesüra tepsetba atema kecha jenjang nunga temeten magütsütettsü aser nisung ka temeten nokdangbaji memelatsüla,” ta Congress-i aniba taoba UPA sorkar nung Ato kilonser Singh-i ashi.
“Nübur mapatong atema tamangba yimsüji tamentaktak ka ama kodanga mamshitettsü aser ibaji tashiyim agi shianga dak-a mebenoktsüla. Lokti temeyoktep balala aliba nung tashi maitba ajanga asen linük tashi mait akumtsü. Rongsenkettsüng aintsü atema yimjung nüngdak aser Indian republic sobaliba tajung amokmeren tia nung lir,” ta paisa ashi.