Shisataka Abdul Kalam

Sensaker kibong ka nungi kima yimdong nung osangkaket yoka aliba jenjang nungi anünglak nung tuagi India nunger meyong satellite yutettsüsa yanglutetba aser yimten nung linük tir asütsü maongka anguba tashitemetetter saka kanga ajemaluba shisataka nisungji Avul Pakir Jainulabdeen Abdul Kalam liasü. Pa tenüngji tetetshitsü langra asüba agi tatsüba agi paia APJ Abdul Kalam ta amshia aru. Iba nisung ya India nunger rongnung mashi nisung ka masü asü. Pa 1954 küm Saint Joseph’s College, Tiruchirappalli nung Physics nung graduate asü aser 1960 küm Madras Institute of Technology nung Aeronautical Engineering nung degree angu. Pa kolok aser pa teka ajanga India nunger alima tsüngdang nümadangtettsüsa inyaktetba mapatemji 1980 küm India-i mezüng anünglak nung Satellite Launch Vehicle (SLV-III) yoktetbaji liasü. Iba sülen India nunger Muslim kati Muslim lima Pakistan-i den tsübutsüsa inyaktetbaji 1980 nungi 90 tashi Integrated Guided Missile Development Programme nung Abdul Kalam tongti ser inyakdang Indiai AGNI aser PRITHVI Missiles yangutet aser pa ketdangsüba nung 1998 kümbo Americai dena tsübutsüsa Pokhran II nuclear tests takok ngua inyaktet. Aji oda, India nung, talisa, tang ama BJP teloki yimsü asüba mapang India ya Hindu nunger meyong, anungji Muslim nunger ajak Pakistani aotsüla aser Christian-tema ajak ano tanaben Hindu akümtsüla ta odia tashiyim dena amshia inyakba mapang, Muslim nunger Abdul Kalam ama ka mali asübo, tang ya India ya tangar alima kintemi amokbanger kanga mezüngmeshia lila ta bilemer.  Aji oda, pa taküm alidang junga mebilemdangi Hindu nunger kari danga India nung Muslim sensotem anema jembia mesüra inyaka lira, pa asüba den külemi iba ama mashikoshi bilembatemji endoktsüla aser India ya Hindu, Muslim mesüra Khristan purtem ajak meyong ta angatettsüla. APJ Abdul Kalam ya India lima meimba scientist ka liasü. Pai teti India ya alima kintem rongnung tashi tulu akaba kin ka südaktsünü. Ibayongji, pa mangdangji 2020 nungbo India ya alima kintem rongnung akaba aser metetba nung jenjang tajungtiba nung alitsü asoshi bilema sentong tapu balala tenzükdakja inyaka arur. Abdul Kalam 2002 küm terkabuba India tir aküm. Pai jangraba mapa kaji linük nung tanur aser lanurtem den tarutsü India tajungba ka asoshi teti bilema shisalemsatepa liasü, Pai kaketshirtrem mulungjang nung linük asoshi shisa tasen bushiloka mapa tulu inyaktsü asoshi ajungshi. Pa linük nung ajak dang temaba saka pai nübortemi pa tongtettsüsa ali. Pa tir asüba mapang, pai India tir kishi lapoktsü aser tanurtem aser aluyimertem shirnok taküm nung tir gate alema aitsü asoshi pongmang nunga mali asü, item purtemji pai anioka tir kidang sensakasem. Abdul Kalami jembiba o ajakji mapa küma inyaktettsüba tagitsü o tem dang liasü. Pai alima meraksaki junga ayutsü aser tzüim telong aser anünglak nung tanga petinutem nungi nisungtem nüngdak bushiteta bener arua amshitsü asoshi lanurtem mulungjang nung shisa tasen apuoktsü. Abdul Kalami ashiba o tongtibang kaji, ” asenoki alima yanglutsü asoshi jembiba mangdangji aonung mejangdang anguba mangdang masü saka asenok amui moudaktsüi bilemtsüsa shisaboludaktsüba mangdang lir.” Iba ama mangdang tulu akaba nisung ka ajungbena alima nungi pilabaji India asoshi dang masü saka alima asoshi kanga takoksa lir. Pai teti pai metetba aser bilembaji lanurtem dang sayutsü jangraa liasü. Ibayongji, pai akok tashi kaketrejutem nung kaketshirtem den ajurutepa jembitsü merang. Aji oda, pai janggraba ama, pa asoshi alima nung tatembangba anogo nung kaketshirtem dang tesayudak nung pa arishi temadok. Ibaji koda taoksatsüka saka jangratemtsüka.  Paibo tetsüi sotsü langa pei tetsü taso lima aser nübortem asoshi inyaktsüogo. Aji oda, linük nung lanurtemi shitakba pai sayuba mangdang, kobai amuia mouteti pei lima asoshi inyaktsü shisaboludaktsür, iba mangdangji ataloktsüsa inyakra, Abdul Kalam süaka masü ama India alima tsüngdang teti tashi itta alitsü.