Shisatsü kanga ainba putu ka nung alir: Dr. SC Jamir

Dimapur, March 15, 2024 (TYO): Tanü asenok shisatsü kanga ainba putu ka nung alir aser tarutsü anogotem kanga melenshia aotsü ta taoba Governor Dr. SC Jamir-i ashi.

Hokolbarnü St Joseph University nung 3 buba convocation sentong nung jembidang Dr. SC Jamir-i “shisatsü ya tashi aser rongsen lir aser asenok shisatsü rongsenketzüng putu ka nung alir” ta ashi.

Shisatsü aser osangtsüsang melenshiba ajanga teinyaktsü aika melenshiogo aser terenlok maparen nung temelenshi aika nguogo ta pai ashi.

“India aser Nagaland temaba jenjang nung ajungkettsü atema kaketshirtem asoshi tanü ya mapang tajung ka lir. St Joseph University nung kaketshirtem kanga junga arangtettsü asoshi ajak teperi lir. Takok angutsü atema magic formula kecha mali saka asenok tajungba akümtsü atema merangtsüla” ta SC Jamir-isa ashi.

Iba University nungi kaketshirtem shisatsü aser skills renloktsü aser alima nung jenjang tajung angutsü tamang akar, ta paisa shisem.

“Iba anogo ajanga Nagaland aser India atema teimba tulu agütsür kechiyong degree anguba graduates-i iba reju nungi anguba shisatsü bener state aser linük renlokba maparen nung shilem agitsü” ta Dr SC. Jamir-isa metetdaktsü.

Tanü graduate asüba kaketshir 1200 rongnungi gold medals angur 33, silver medals angur 32 aser doctorate degrees kaketshir 12 liasü.